ကြားကာလပညာရေးအတွက် ဖွင့်လှစ်တည်ထောင်ထားတဲ့ FOEIM အွန်လိုင်းသင်တန်းကျောင်းမှာ တည်ထောင်သူရဲ့ ငွေကြေးပြဿနာ အရှုပ်အရှင်းဖြစ်ပြီး ၂ လနီးပါးအကြာမှာ ဆရာ/ဆရာမအားလုံးနီးပါး နုတ်ထွက်သွားပါတယ်။

FOEIM သင်တန်းကျောင်းအောက်မှာ ဆက်လက်သင်ကြားတော့မှာမဟုတ်ဘဲ ဆရာ/ဆရာမ ၃၈၂ ယောက်တိတိနုတ်ထွက်ကြောင်း သင်ကြားရေးဆရာ/ဆရာမတွေက ဖေဖော်ဝါရီ ၆ ရက်မှာ  ထုတ်ပြန်ကြေညာခဲ့ပါတယ်။

သင်ကြားရေးဆိုင်ရာ ကိစ္စတွေကိုတော့ လတ်တလောမှာ ပုံမှန်အတိုင်းဆောင်ရွက်မှာဖြစ်ပြီးတော့ FOEIM အောက်ကနေ ခွဲထွက်ပြီး ကျောင်းသစ်တည်ထောင်နိုင်ဖို့စီစဉ်နေကြောင်းလည်း ပူးတွဲထုတ်ပြန်ထားပါတယ်။

အခုလို နုတ်ထွက်ရတဲ့ကိစ္စနဲ့ပတ်သက်ပြီး  FOEIM ဆရာမတစ်ဦးက  “တည်ထောင်သူ ဘက်က ဖြေရှင်းချက်တွေဟာ လကုန်လို့ လစာရရင်ပြီး‌ရော ငွေစာရင်းရှင်းတမ်းလာ မထုတ်ခိုင်းနဲ့ဆိုတဲ့ သဘောမျိုးသက်ရောက်နေတယ်။၊ တော်လှန်ရေးကျောင်းတ‌ကျောင်းအနေနဲ့ ငွေကြေးနဲ့ ပတ်သက်ပြီး ပွင့်လင်းမြင်သာမှုရှိဖို့လိုတယ်လို့ယူဆတာကြောင့် နုတ်ထွက်ခဲ့တာ” လို့ ပြောပါတယ်။

FOEIM ကဆရာ/ဆရာမတွေအနေနဲ့ တခြားနာမည်အသစ်တစ်ခုနဲ့ ကျောင်းကို ဆက်ဖွင့်ဖို့ပြင်နေပြီး အခုလက်ရှိမှာတော့ အတန်းတွေခဏနားထားတယ်လို့လည်း FOEIM မှာ တက်ရောက်နေတဲ့ ကျောင်းသားတစ်ဦးက ဒီဗွီဘီကို ပြောပါတယ်။

“အတန်းတွေကတော့ အခု ခဏနားထားတယ်။ ကျောင်းအသစ်မှာ ဆက်တက်ဖို့တော့ Form ပုံစံ ဖြည့်ထားပါတယ်။” 

ပြီးခဲ့တဲ့နှစ် နိုဝင်ဘာလကတည်းက FOEIM သင်တန်းကျောင်း တည်ထောင်သူရဲ့ ငွေကြေးစီမံခန့်ခွဲ မှုနဲ့ပက်သတ်ပြီး ဝေဖန်သံတွေ ထွက်ပေါ်လာခဲ့ပြီးနောက်  အမျိုးသားညီညွတ်ရေးအစိုးရရဲ့ ကြားနာစုံစမ်းရေးအဖွဲ့ရဲ့ အစီရင်ခံချက်အရ FOEIM ကျောင်းတည်ထောင်သူထံ ကျန်ရှိနေရမယ့် ငွေပမာဏဟာ ကျပ်သိန်း  ၃၀,၈၀၀ ကျော်ဖြစ်တယ်လို့ သိရပါတယ်။

ဒီကျောင်းကိစ္စနဲ့ ပတ်သက်ပြီး NUG ပညာရေးဝန်ကြီးဌာနဟာ တိုင်ကြားသူတွေ၊ တိုင်ကြားခံရသူနဲ့ သင်ကြားရေး ဆရာ၊ ဆရာမတွေကို တွေ့ဆုံပြီး နွေဦးတော်လှန်ရေးကို မျက်နှာမူကာ ပညာရေးဝန်ကြီးဌာနက ဆောင်ရွက်မယ့် လုပ်ငန်းစဉ်အဆင့်ဆင့်ကို ရှင်းလင်းသွားမယ်လို့ ပြီးခဲ့တဲ့လက ကြေညာထားပါတယ်။

ကျောင်းသားတွေရဲ့ ပညာရေးအခွင့်အလမ်းမဆုံးရှုံးစေဖို့နဲ့ လက်ရှိ သင်ယူနေမှုတွေကို အာမခံချက်ရှိအောင် စီစဉ်ဆောင်ရွက်ပေးသွားမှာဖြစ်လို့ မိဘတွေ၊ ကျောင်းသားတွေနဲ့ ဆရာတွေ စိတ်ပူပန်မှုမရှိဘဲ ပညာသင်ကြားရေးကို ဆက်လက်ဆောင်ရွက်သွားကြဖို့လည်း NUG အစိုးရက  မေတ္တာရပ်ခံ ပန်ကြားထားပါတယ်။

အခမဲ့အခြေခံပညာအဖွဲ့အစည်းတခုဖြစ်တဲ့ Free Online Educational Institution Myanmar (FOEIM) က အမျိုးသားညီညွတ်ရေးအစိုးရ (NUG) နဲ့ ချိတ်ဆက်ကာ ကြားကာလပညာရေးအတွက် တော်လှန်ရေးကျောင်းတွေ ဖွင့်လှစ်သင်ကြားနေပြီး မူလတန်းကျောင်းသားသစ်တွေ ခေါ်ယူနေပါတယ်။

FOEIM အနေနဲ့ အခုနှစ် ၂၀၂၂-၂၀၂၃ ပညာသင်နှစ်အတွက် မူလတန်းဆင့် အတန်းတွေဖြစ်တဲ့ Grade 2, Grade 3 နဲ့ Grade 4 ကျောင်းသား၊ ကျောင်းသူတွေကို စတင်လက်ခံနေတာဖြစ်ပြီး အတန်းချိန်တွေအနေနဲ့ တနင်္လာကနေ သောကြာနေ့အထိ နေ့စဉ်မနက် ၉ နာရီကနေ ညနေ ၄ နာရီအတွင်းသာဖြစ်ပြီး တပတ်မှာ စာသင်ချိန်စုစုပေါင်း ၁၀ နာရီရှိမယ်လို့ ဆိုပါတယ်။

ဒီအတန်းတွေမှာတော့ သင်ကြားရေး ဆရာ၊ ဆရာမတွေ လိုအပ်တဲ့ အင်တာနက်ဒေတာဖိုး ထောက်ပံ့နိုင်ဖို့ လစဉ် ၆၀၀၀ ကျပ် ကောက်ခံမှာဖြစ်ပြီး၊ ကျောင်းလခကတော့ အခမဲ့ဖြစ်ကာ အတန်းတတန်းမှာ ကျောင်းသား ဦးရေ ၃၀၀ သာ လက်ခံပေးသွားမယ်လို့ ကြေညာထားပါတယ်။

ကျောင်းသားသစ် ခေါ်ယူမှုမှာတော့ လက်ရှိ FOEIM အတန်းတွေက ကျောင်းသား၊ ကျောင်းသူတွေနဲ့ E-Classes of FOEIM က ကျောင်းသား၊ ကျောင်းသူတွေ အပ်နှံဖို့ မလိုအပ်ကြောင်းနဲ့ ကျောင်းအပ်ထားသူတွေကို လာမယ့်မေ ၈ ရက်မှာ အီးမေးလ်ကတဆင့် ဆက်သွယ်အကြောင်းပြန်ပေးမယ်လို့ ဆိုပါတယ်။

FOEIM  ဟာ နွေဦးတော်လှန်ရေးကာလမှာ အခြေခံပညာ ကျောင်းသား၊ ကျောင်းသူတွေကို အွန်လိုင်းနဲ့ မြေပြင်မှတဆင့် စဉ်ဆက်မပြတ် ပညာရေးပေးကာ ကြားကာလ ပြည်သူ့ပညာရေး ယန္တရားကို ဖော်ဆောင်နေတဲ့ လူထုအဖွဲ့ အစည်းတခု၊ ဒါမှမဟုတ် တော်လှန်ရေးကျောင်းတခုဖြစ်တယ်လို့ ဆိုပါတယ်။

ပြီးခဲ့တဲ့ ၂၀၂၁-၂၀၂၂ ပညာသင်နှစ်မှာ FOEIM ဟာ ကျောင်းသား၊ ကျောင်းသူတွေကို အွန်လိုင်းကတဆင့် ကြားကာလ အခြေခံပညာရေးကို စဉ်ဆက်မပြတ် ရရှိအောင် အခမဲ့ ပညာရေးရရှိစေဖို့ အစွမ်းကုန်ကြိုးစားခဲ့သလို၊ အခုလာမယ့် ပညာသင်နှစ်မှာလည်း အွန်လိုင်းကသာမက မြေပြင်မှာပါ စဉ်ဆက်မပြတ်ပညာရေးပေးစွမ်းနိုင်ဖို့ ကြိုးစားအကောင်အထည်ဖော်နေတယ်လို့ ဆိုပါတယ်။

ဒါကြောင့်မို့ FOEIM အနေနဲ့ ကြားကာလ အွန်လိုင်းပညာရေးနဲ့ ကြားကာလ မြေပြင်ပညာရေးဆိုပြီးတော့ ၂ မျိုးခွဲကာ သင်ရိုးသတ်မှတ်ပုံ၊ သင်ကြားရေးနဲ့ တတ်မြောက်မှုစစ်ဆေးခြင်းသတ်မှတ်ပုံတို့ကို ရေးဆွဲကာ ပိုမိုကောင်းမွန်တဲ့ ပညာ ရေးစနစ်ဖြစ်ပေါ်စေဖို့လည်း ကြိုးစားနေတယ်လို့ ဆိုပါတယ်။

လတ်တလော ခေါ်ယူထားတဲ့ မူလတန်းကျောင်းသားသစ်တွေအနေနဲ့ ကျောင်းအပ်နှံလိုတယ်ဆိုရင်တော့ ဖော်ပြပါ လင့်ခ်တွေကတဆင့် အပ်နှံသင်ကြားနိုင်မှာ ဖြစ်ပါတယ်။

Grade-2 ကျောင်းအပ်ရန် form

Grade-3 ကျောင်းအပ်ရန် form

Grade-4 ကျောင်းအပ်ရန် form