ရန်ကုန်တိုင်း၊ မင်္ဂလာဒုံမြို့နယ်၊ ပေါက်ကုန်းရပ်ကွက်ရှိ Mytel တာဝါတိုင် မတ်လ ၂၇ ရက် ဒီနေ့ မနက် ဗုံးခွဲတိုက်ခိုက်ခံရပြီး စစ်ကောင်စီတပ်တွေက ပိတ်ဆို့စစ်ဆေးနေတယ်လို့ ရပ်ကွက်နေသူတွေဆီက သိရပါတယ်။
ဒီမနက် ၈ နာရီလောက်မှာ ပေါက်ကုန်းရပ်ကွက် အာသာဝတီလမ်းသွယ်နဲ့ ရတနာဒီပံဘုန်းတော်ကြီးကျောင်းအနီး လယ်ကွင်းအတွင်းရှိ Mytelတာဝါတိုင် ဗုံးခွဲတိုက်ခိုက်ခံရပြီး ပျက်စီးသွားတယ်လို့ ရပ်ကွက်နေသူတစ်ဦးက ဒီဗွီဘီ ကိုပြောပါတယ်။
"ဗုံးပေါက်တော့ စစ်တပ်နဲ့ရဲတွေ ရောက်လာပြီး အဲ့နေရာကို စစ်တာ နောက်ထပ်လက်လုပ်ဗုံးတွေ ထပ်တွေ့တယ် စစ်တပ်ကပဲ ယူသွားပြီး ဖျက်ဆီးလိုက်တာ။”
ဗုံးပေါက်ကွဲခဲ့တဲ့ Mytel တာဝါတိုင်ဟာ နံပတ် YGN-1595 Mytel တာဝါတိုင်ဖြစ်တယ်လို့ ဆက်သွယ်ရေးနဲ့နီးစပ်သူတစ်ဦးက ပြောပါတယ်။
"စစ်တပ်က သူတို့တာဝန်ယူထားတဲ့ Mytel တာဝါတိုင်ပျက်စီးသွားလို့ အကုန်လုံးပိတ်ဆို့စစ်ဆေးနေတယ်။"
လက်တလောမှာ ပေါက်ကုန်းရပ်ကွက်နဲ့ စမ်းကြီးဝကျေးရွာဘက်မှာ စစ်ကောင်စီတပ်နဲ့ ရဲတွေက လမ်းသွားလမ်းလာနဲ့ ဆိုင်ကယ်တွေကို စစ်ဆေးနေတယ်လို့ ရပ်ကွက်နေသူရဲ့ ပြောပြချက်အရ သိရပါတယ်။
ဒီမနက် ၆ နာရီကျော်ကလည်း မှော်ဘီမြို့ရှိ ကုလားကုန်းကျေးရွာရှိ မြွေဆိပ်ဖြေဆေးထုတ်လုပ်ရေးဌာနခွဲမှာ ဗုံးပေါက်ကွဲခဲ့ပါတယ်။
မွန်ပြည်နယ်၊ ရေးမြို့နယ်၊ ကျုံလောင်းရွာဟောင်းကျေးရွာမှာရှိတဲ့ စစ်ကောင်စီတပ်ပိုင် Mytel တာဝါတိုင်တတိုင်ကို ဇန်နဝါရီ ၂ ရက် မနက် ၈ နာရီလောက်က လက်နက်ကြီးနဲ့ ပစ်ခတ်ဖျက်ဆီးလိုက်တယ်လို့ ရေးဘီလူးအဖွဲ့ခေါင်းဆောင်က ပြောပါတယ်။
“အရင်တခေါက် ကျပ်သိန်း ၅၀၀ နဲ့ ပြန်ပြင်လိုက်ရတဲ့ ကျုံလောင်းရွာဟောင်း Mytel တာဝါတိုင်ကြီး ခုမနက် သိန်း ၂,၀၀၀ ဖိုးလောက်ရှိမယ်။ စလောင်းဘန်းတွေ စက်တွေ အပါအဝင် အားလုံးကိုပါ ထပ်မံဖျက်ဆီးပစ်လိုက်ပါတယ်။”
မနက်က သေနတ်သံပစ်တာ လက်နက်ကြီးအသံတချက်ကြားရပြီး လက်နက်ငယ်အသံပါ ၁၀ ချက်မက ထပ်မံကြားရကာ မိနစ်အနည်းငယ်ကြာပစ်ပြီး ငြိမ်သွားတယ်လို့ ဒေသခံတွေက ပြောပါတယ်။
ရေးဘီလူးအဖွဲ့ဟာ ဇန်နဝါရီ ၁ ရက်က မွန်ပြည်နယ်အတွင်းက စစ်ကောင်စီလက်အောက်မှာ အမှုထမ်းနေတဲ့ လက်နက်ကိုင်တွေအားလုံး လက်ရှိရာထူးကနေ နုတ်ထွက်သွားကြဖို့ ထပ်မံ နောက်ဆုံးသတိပေးထားပါတယ်။
မြန်မာတနိုင်ငံလုံးမှာရှိတဲ့ စစ်တပ်ပိုင် Mytel တာဝါတိုင်တွေကို ဒေသခံကာကွယ်ရေး တပ်ဖွဲ့ဝင်တွေက မိုင်းခွဲဖျက်ဆီးခဲ့ရာမှာ ပြီးခဲ့တဲ့နှစ်က Mytel တိုင်ပေါင်း ၂,၀၀၀ ကျော် ဖျက်ဆီးခံရလို့ ကျပ်ငွေသန်းနဲ့ချီ ဆုံးရှုံးထားပါတယ်။
