လာမယ့် ဖေဖော်ဝါရီ ၁ ရက်နေ့ စစ်တပ်က တိုင်းပြည်အာဏာကို တရားမဝင် လုယူခဲ့တဲ့ ၂ နှစ်ပြည့်နေ့မှာ "တသံတည်းညီ တချီတည်းရုန်း"ကြွေးကြော်သံနဲ့ နိုင်ငံတဝန်း  “Silent Strike”  တိတ်ဆိတ်ငြိမ်သက်ခြင်းသပိတ်ဆင်နွှဲမှာဖြစ်လို့ ပြည်သူတွေအားလုံး ပူးပေါင်းပါဝင်ကြဖို့ တော်လှန်ရေး အင်အားစုတွေက တိုက်တွန်းနှိုးဆော်ထားတယ်။

Silent Strike ကို ၂၀၂၃ ခုနှစ် ဖေဖော်ဝါရီ ၁ ရက် မနက် ၁၀ နာရီကနေ ညနေ ၃ နာရီအတွင်း အပြင်မထွက်ဘဲပူးပေါင်းပါဝင်ကြဖို့ ဆိုင်တွေရုံးတွေပိတ်စရာမလိုဘဲ လမ်းပေါ်မထွက်ရုံနဲ့တင် ပူးပေါင်း ပါဝင်နိုင်ကြောင်း ရေဘဝဲပြည်သူ့အကျိုးပြုလူငယ်အဖွဲ့အစည်းကဆိုပါတယ်။

နွေဦးတော်လှန်ရေးမှာတက်ကြွစွာပါဝင်နေတဲ့ ဒေါက်တာဖြိုးသီဟက "အ​ခြေအ​နေ​ကြောင့် အလုပ်​တွေ ပြန်လုပ်​​နေကြရတယ်။ လည်ပတ်​နေကြရတယ်ဆို​ပေမဲ့ နိုင်ငံဟာ ခုထိ စစ်ဖိနပ်​အောက်က​နေ မလွတ်​သေးဘူး၊ ဘယ်​တော့မှ အသားတကျ ဖြစ်သွားမှာ မဟုတ်ဘူး၊ စစ်အာဏာရှင်​တွေကို ဆန့်ကျင်​နေဆဲပဲ ဖြစ်တယ်ဆိုတာကို ပြသတဲ့အ​နေနဲ့ ပါဝင်​ပေးကြပါ။ ဒီတစ်ကြိမ် Silent Strike ကိုလည်း ​ရှေ့အကြိမ်​တွေတုန်းကလိုပဲ ​အောင်မြင်ချင်ပါတယ်"လို့ပြောပါတယ်။

ရန်ကုန်မြို့‌နေ ရုံးဝန်ထမ်းတစ်ဦးကလည်း "ပါဝင်မှာပေါ့ ကြိမ်းသေပါဝင်မှာပါ ရုံးတက် ရုံးဆင်းချိန်တွေလည်းလွတ်တဲ့အတွက် အရင်ကထက်ပါဝင်ဖို့ ပိုဆင်ပြေတယ်လေ ကျမတို့ပြည်သူတွေအနေနဲ့လည်း သွေးမအေးသေးပါဘူးဆိုတာ ပြသချင်ပါတယ်"လို့ ပြောကြားခဲ့ပါတယ်။

ပြီးခဲ့တဲ့ Silent Strike သပိတ်တွေမှာတုန်းကတော့ စစ်ကောင်စီက ဈေးဆိုင်ခန်းတွေကို မပိတ်ခိုင်းတာမျိုး ပိတ်ထားတဲ့ဆိုင်ခန်းတွေကို ဖျက်ဆီးပစ်တာမျိုးလုပ်ခဲ့တဲ့အတွက် အခုအခါမှာ ပြည်သူ့အိုးအိမ်တွေအတတ်နိုင်ဆုံးလုံခြုံအောင် စီစဉ်ထားတယ်လို့ Silent Strike ဖြစ်မြောက်ရေးအတွက် ကြိုးပမ်းနေကြတဲ့ တော်လှန်ရေးအဖွဲ့ အစည်းတွေကဆိုပါတယ်။

ဖေဖော်ဝါရီ ၁ ရက်နေ့မှာ တပ်ထောက်ခံသူတွေကလည်း  အာဏာသိမ်း စစ်ကောင်စီကို ထောက်ခံတဲ့ ဆန္ဒပြပွဲကို နေ့စားခတိုးပေးပြီး ကျင်းပဖို့ စီစဉ်နေတယ်လို့ သတင်းတွေ ထွက်ပေါ်နေပါတယ်။

စစ်အာဏာသိမ်း နှစ်ပတ်လည်နေ့ ဖေဖော်ဝါရီ ၁ ရက်မှာ ဖွင့်ပွဲလုပ်ဖို့ စီစဉ်ထားတဲ့ ပဲခူးတိုင်း၊ ဒိုက်ဦးမြို့က လမ်းဖွင့်ပွဲဆိုင်းဘုတ်ကြီး ဖွင့်ပွဲမစခင် လေတိုက်တာကြောင့် ပြိုလဲကျသွားတယ်လို့ ဒေသခံတွေဆီက သိရပါတယ်။

ဒေသခံတယောက်က “သူတို့ကဖွင့်ပွဲကို စစ်ကောင်စီဘက်က အကောင်ကြီးတွေ၊ စစ်အာဏာသိမ်းအစိုးရက လူတွေလာဖွင့်ဖို့ စီစဉ်ထားကြတာ၊ အခုတော့ သောက်ရှက်ကွဲတာပေါ့။ သူတို့မဖွင့်ခင်ကို သူတို့ ဆိုင်းဘုတ်ကြီးက ဒီနေ့ Silent Strike နေ့မှာ  ပြိုလဲသွားတာ” လို့  ပြောပါတယ်။ 

ဒီလမ်းက ဒိုက်ဦးမြို့ မြို့မဈေး‌ရှေ့ကလမ်းဖြစ်ပြီး  လမ်းဟောင်းကို ထပ်ပိုးကတ္တရာခင်းတာဖြစ်ပါတယ်။

အာဏာသိမ်း စစ်ကောင်စီက ဖိအားပေးမှုတွေ ရှိနေတဲ့ကြားက  မွန်ပြည်နယ် မော်လမြိုင်မြို့နေ ပြည်သူတွေဟာ  စစ်အာဏာရှင်ကိုဆန့်ကျင်ကြောင်းပြသတဲ့အနေနဲ့ အာဏာသိမ်း တစ်နှစ်ပြည့်တဲ့ ဖေဖော်ဝါရီ ၁ ရက်နေ့ အသံတိတ် သပိတ် Silent Strike မှာ ပူးပေါင်းပါဝင်နေကြပါတယ်။

မော်လမြိုင်ရဲ့ အဓိကလမ်းမကြီးတွေ ဖြစ်တဲ့ အောက်လမ်းမကြီး၊ ဗဟိုလမ်းနဲ့ အထက်လမ်းမကြီးတွေမှာ မနက် ၁၀ နာရီကစပြီး လူသူသွားလာမှု မရှိသလောက် နည်းပါးနေတာပါ။

မော်လမြိုင်မြို့အတွင်းရှိ ဈေးတွေကိုလည်း စစ်ကောင်စီက မဖြစ်မနေဆိုင်ဖွင့်ဖို့ အတင်းဓမ္မ လက်မှတ်ထိုးခိုင်းထားတာကြောင့် ဆိုင်တွေ ဖွင့်လှစ်ထားပေမယ့် အရောင်းအဝယ်သူ မရှိဘဲ ဖြစ်နေတာပါ။

စစ်ကောင်စီကတော့ အသံတိတ် သပိတ်ကို တုံ့ပြန်တဲ့ အနေနဲ့ မော်လမြိုင်မှာ စစ်တပ် ထောက်ခံပွဲ လုပ်တာ၊ ရပ်ကွက်တွေမှာ စတုဒီတာကျွေးဖို့အတွက် အုပ်ချုပ်ရေးမှူးတွေကို တစ်ရပ်ကွက် ကျပ် ၂ သိန်းထောက်ပံ့တာ၊ အသံချဲ့စက်ကြီးတွေနဲ့ သီချင်းဖွင့်တာ၊ ထမနဲထိုးပွဲတွေ ပြုလုပ်နေတာပါ။

ဒါ့အပြင် မော်လမြိုင်ရဲ့ မြို့ပေါ်ရပ်ကွက်အများစုမှာလည်း စစ်ကောင်စီတပ်ဖွဲ့ဝင်တွေက ဆိုင်မဖွင့်တဲ့ ဈေးဆိုင်တွေကို လိုက်လံ စစ်ဆေးနေသလို ရပ်ကွက်တချို့မှာတော့ အရပ်ဝတ်တွေနဲ့ လုံခြုံရေးယူထားတာ မြင်တွေ့ရပါတယ်။

မန္တလေးမြို့မှာ ဖေဖော်ဝါရီ ၁ ရက်နေ့ စစ်ကောင်စီက ဈေးဆိုင်တွေကို ခြိမ်းခြောက် ဖိအားပေးဖွင့်ခိုင်းပေမယ့် လမ်းတွေမှာ လူမစည်ပဲဖြစ်နေပြီး အသံတိတ်သပိတ်မှာ ပြည်သူအများ ပူးပေါင်းပါဝင်ကြတာကို တွေ့ရပါတယ်။

မန္တလေးမြို့ရဲ့ အထင်ကရဈေးဖြစ်တဲ့ စျေးချို၊ မန်းမြန်မာပလာဇာတို့က စျေးဆိုင်တွေကို မဖွင့်ရင် အရေးယူမယ်ဆိုတာကြောင့် ဖွင့်ထားပေမယ့် အရောင်းအဝယ်မရှိ၊ အသွားအလာမရှိ ဖြစ်ပါတယ်။

ဒါ့အပြင် အမရပူရမြို့နယ်၊ ပြည်ကြီးတံခွန်မြို့နယ် စက်မှုဇုန်တို့မှာလည်း ဈေးဆိုင်ဖွင့်ရမယ်ဆိုပြီး လက်မှတ်ထိုးရတာကြောင့် ဖွင့်ထားရတာရှိနေပါတယ်။

စစ်ကောင်စီတပ်သားတွေကလည်း မန္တလေးမြို့မှာ လှည့်လည်နေကြတဲ့အပြင် လမ်းဆုံ လမ်းခွတချို့မှာလည်း အရပ်ဝတ် နဲ့ ယူနီဖောင်းဝတ်တွေကို ကင်းပုန်းချထားကြပါတယ်။

ပြည်တော်ဝင်ဖို့ ရုန်းကြစို့ဆိုတဲ့ အသံတိတ် အာဏာဖီဆန်ရေး လှုပ်ရှားမှုနေ့မှာပဲ ပြည်အများ ပုံမှန်အတိုင်းသွားလာဖို့ စစ်ကောင်စီက ပုံစံမျိုးစုံဖိအားပေး လုပ်ဆောင်ပေမယ့် ပြည်သူအများ အနေနဲ့ စစ်အာဏာရှင်ဆန့်ကျင်ရေး အသံသိတ်သပိတ်မှာ ပူးပေါင်းပါဝင်ကြပါတယ်။

ဒီလို အသံတိတ်လှုပ်ရှားမှုမှာ ပါဝင်ပြီး ဖေဖော်ဝါရီ ၁ ရက်နေ့ ဆိုင်ပိတ်မယ့်အကြောင်း လူမှုကွန်ရက်မှာရေးတင်တဲ့ ဆိုင်တချို့ကို စစ်ကောင်စီတပ်တွေက မတရား ဝင်ရောက်ဖမ်းဆီးတာ နဲ့ ဆိုင်တွေကို ချိတ်ပိတ်တာတွေ ကြုံခဲ့ရကြပါတယ်။