ရန်ကုန်မြို့မှာ ပြေးဆွဲနေတဲ့ အငှားယာဉ် တက္ကစီတွေမှာ စမတ်မီတာတွေ တပ်ဆင်ဖို့ စတင်လုပ်ဆောင်နေပြီလို့ စစ်ကောင်စီလက်အောက်ခံ ရန်ကုန်တိုင်းဒေသကြီး ပုဂ္ဂလိက သယ်ယူပို့ဆောင်ရေး ကြီးကြပ်မှုကော်မတီ (YRTC) က မတ် ၁၃ ရက်မှာ ထုတ်ပြန်ပါတယ်။

YRTC အနေနဲ့ အငှားယာဉ်အစီးရေ ၅၀၀ ဝန်းကျင်ကို ပထမဦးဆုံးအနေနဲ့ စမ်းသပ်ပြေးဆွဲဖို့ ဆောင်ရွက်နေပြီး စနစ်တကျ လုံခြုံမှုရှိရှိနဲ့ ပြေးဆွဲနိုင်ဖို့အပြင် စီးနင်းမယ့် ခရီးသည်တွေ အတွက်လည်း သင့်တင့်မျှတတဲ့ ဈေးနှုန်းတွေ ဖြစ်ပေါ်လာဖို့ ရည်ရွယ်တာလို့လည်း ဆိုပါတယ်။

အဲဒီလို မီတာတွေတပ်ဆင်ပြီးရင် ယာဉ်စီးခနှုန်းထားတွေကိုလည်း CNG စျေးနှုန်းနဲ့ တွက်ချက်ကောက်ခံမှာမဟုတ်ဘဲ စက်သုံးဆီစျေးနှုန်းပေါ် မူတည်ပြီး ကောက်ခံသွားမှာ ဖြစ်တာကြောင့် ရန်ကုန်မြို့က ယာဉ်လမ်းကြောပိတ်ဆို့မှုများတဲ့အတွက် မီတာစနစ်က အဆင်မပြေနိုင်ဘဲ မီတာစနစ်သုံးမယ်ဆိုရင် ကားသမားတွေအပြင် ခရီးသည်တွေလည်း နစ်နာမှုတွေ ရှိနိုင်သလို စကားများရတဲ့ အခြေအနေတွေလည်း ရှိလာနိုင်တယ်လို့ ရန်ကုန်မြို့ခံ ခရီးသွားပြည်သူတဦးက ပြောပါတယ်။

တဖက်မှာလည်း ရန်ကုန်မြို့တွင်းမှာ ကီလိုမီတာအသုံးပြုပြီး ယာဉ်စီးခ ကောက်ခံစနစ် အသုံးပြုနေတဲ့ တက္ကစီအဖွဲ့ပေါင်း ၄၀ ဝန်းကျင်ခန့် ရှိတယ်လို့ တက္ကစီဆွဲနေတဲ့ ယာဉ်မောင်းတဦးက ပြောပါတယ်။

အဆိုပါအဖွဲ့တွေအနေနဲ့ YRTC နဲ့လည်း အစည်းအဝေး ပြုလုပ်ပြီးသွားပြီဖြစ်သလို YRTC ဘက်က ပုံသေဈေးနှုန်း ပြန်လုပ်ပေးမယ်လို့ ပြောထားကာ မီတာတွေလည်း တပ်ပေးမယ်လို့ပြောပြီး ဘာမှတော့ အတည်ပြုလို့ မရသေးဘူးလို့ တွေ့ဆုံဆွေးနွေးရာမှာ ပါဝင်ခဲ့တဲ့ အငှားယာဉ်မောင်းတဦးက ဆိုပါတယ်။

“မြန်မာပြည်မှာက ဘာပဲလုပ်လုပ် ကွင်းဆင်းလေ့လာမှု မရှိဘူး။ ဒီစနစ်ကြီး အောင်မြင်နိုင်မလားဆိုတဲ့ ဆာဗေးမရှိဘူး။ ဒီစနစ်ကြီးက လူထုကို ဘယ်လောက်အထိ အကျိုးပြုလဲဆိုတဲ့ ဆာဗေးလည်း မရှိဘူး” လို့ ရန်ကုန်မြို့ခံ ပြည်သူတဦးက မှတ်ချက်ပြုပါတယ်။

“အဓိကကတော့ မဖြစ်ဖြစ်အောင်လုပ်၊ ဒီစီမံချက်ကြီးကို လုပ်၊ လူတွေက မီတာတက္ကစီဖြစ်ဖို့ စက်တွေလိုက်ဝယ်၊ မရှိရင် ဒဏ်ငွေရိုက်၊ အဲဒီလိုနည်းနဲ့ ပိုက်ဆံကို ယူတဲ့နည်းပေါ့။ အရင်တုန်းကလည်း ကားသမားတွေက မီတာတော့ တပ်ထားတယ်၊ ခရီးသည်နဲ့ပေါင်းပြီး ညှိနှိင်းစျေးနဲ့ပဲ သွားခဲ့ကြတာ၊ မအောင်မြင်ခဲ့တာကို ပြန်လုပ်မယ်ဆိုတာ ဌာနဆိုင်ရာက ပစ္စည်းတင်သွင်းမယ့်လူတွေနဲ့ ပေါင်းပြီး ပိုက်ဆံဘယ်လိုရှာရမလဲ ဆိုတာမျိုးပေါ့။ ဒါက လူထုကိုဗဟိုပြုတဲ့ စနစ်မဟုတ်ဘူး။ ဌာနဆိုင်ရာတွေ၊ ယာဉ်ထိန်းရဲတွေ ပိုက်ဆံရဖို့အတွက် လုပ်တဲ့စနစ်ဆိုတော့ ဘယ်လိုမှ မအောင်မြင်နိုင်ဘူး။”

တက္ကဆီတွေမှာ စမတ်မီတာအသုံးပြုပြီး ယာဥ်စီးခကောက်ခံနိုင်မယ့် စနစ်ကို အရင် စစ်အစိုးရလက်ထက် ၂၀၀၈ ခုနှစ်က တကြိမ်၊ ၂၀၁၃ ခုနှစ်မှာလည်း တကြိမ် လုပ်ဆောင်ခဲ့ပေမဲ့ အောင်မြင်ခဲ့ခြင်းမရှိသလို လက်ရှိ စစ်အာဏာသိမ်းထားတဲ့ ၂၀၂၃ မှာလည်း စစ်ကောင်စီရဲ့ YRTC က ထပ်မံကြိုးစားလာတာ ဖြစ်ပါတယ်။

ရန်ကုန်တိုင်း နယ်နိမိတ်ပြင်ပနဲ့ ပြည်နယ်တိုင်းတွေကို သွားမယ့် အဝေးပြေးယာဉ်နဲ့ ကုန်တင်ကားတွေအနေနဲ့ ဖေဖော်ဝါရီ ၁ ရက်ကစပြီး သတ်မှတ်လမ်းကြောင်းတွေအတိုင်း မောင်းနှင်ရမယ်လို့ စစ်ကောင်စီလက်အောက်ခံ ရန်ကုန်တိုင်းပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ YRTC က ညွှန်ကြားလိုက်ပါတယ်။

အခုလို သတ်မှတ်လမ်းကြောင်းတွေအတိုင်း သွားလာစေတာက အမှတ် ၃ လမ်းမကြီးနဲ့ ခရေပင်လမ်းဆုံ မီးပွိုင့်ရဲ့ ယာဥ်ကြောတွေ ပိတ်ဆို့ကျပ်တည်းနေမှုကို လျှော့ချဖို့လို့ ဆိုပါတယ်။

အဝေးပြေးကားတွေကို လမ်းကြောင်းသုံးခုခွဲပြီး သွားလာစေဖို့ စစ်ကောင်စီက ညွှန်ကြားထားတာလို့ ဆိုပါတယ်။

အောင်မင်္ဂလာအဝေးပြေး၀င်းက ထွက်တဲ့  Express  အဝေးပြေးကားတွေ (ကုန်တင်ယာဥ်များမပါ) အနေနဲ့ ခရေပင်လမ်းဆုံကနေ ပြည်လမ်းအတိုင်း ထွက်ကာ အမြန်လမ်းကို အသွား/အပြန်  မောင်းနှင်ရမယ်လို့ သတ်မှတ်ထားပါတယ်။

အင်းစိန်ဘက်က ထွက်တဲ့ အဝေးပြေး ကုန်တင်/ကုန်သေတ္တာတင်ကားတွေကတော့ အမှတ်(၄) လမ်းမကြီး−လှော်ကား−ထောက်ကြံ့မြို့ပတ်လမ်းကတဆင့် ရန်ကုန်−ပဲခူး လမ်းဟောင်းအတိုင်း အသွား၊ အပြန် မောင်းနှင်ရမယ်လို့ ဆိုထားပါတယ်။

ရန်ကုန်တိုင်းနယ်နိမိတ်အတွင်း ပုံမှန်သွားလာနေတဲ့ ကုန်တင်ကားနဲ့ ကုန်သေတ္တာကားတွေ၊ သီလဝါနဲ့ အရှေ့ဒဂုံဘက်ကနေ ဇေကမ္ဘာစက်မှုဇုန်ကတဆင့် ထွက်ခွာလာတဲ့ အဝေးပြေး ကုန်တင်နဲ့ ကုန်သေတ္တာတင်ကားတွေ၊ မော်လမြိုင်-ရေး-ထားဝယ်-မြိတ်-တနင်္သာရီနဲ့ ကော့သောင်း သွားမယ့် အဝေးပြေးအိတ်စ်ပရက်စ်ကားတွေအနေနဲ့ အမှတ် ၃ လမ်းကတဆင့် ပဲခူးလမ်းဟောင်းအတိုင်း အသွားအပြန် မောင်းနှင်ရမယ်လို့ သတ်မှတ်ထားပါတယ်။

သတ်မှတ်လမ်းကြောင်းအတိုင်း သွားလာခြင်း ရှိ၊ မရှိကိုတော့ မြို့နယ်အဆင့်စစ်ဆေး အရေးယူရေး ဆပ်မတီတွေက အလှည့်ကျ စစ်ဆေးကြပ်မတ်သွားမယ်လို့လည်း ထုတ်ပြန်ချက်မှာ ထည့်သွင်းထားပါတယ်။