Депутат Сафар Остонов қонунни нега бузмоқда?

Rost24 нашри депутат Сафар Остоновнинг қонунга хилоф тарзда газета бош муҳаррири бўлиб қолаётганига эътибор қаратди.

Мақолада билдирилишича, Сафар Остонов ўтган йилнинг 22 декабрида Самарқанд вилоятининг Каттақўрғон 63-сайлов округидан Олий Мажлиснинг Қонунчилик палатасига депутат қилиб сайланган эди. 

«Ўзбекистон Республикаси Олий Мажлиси Қонунчилик палатаси депутатининг ва Сенати аъзосининг мақоми тўғрисида»ги қонунга кўра, Қонунчилик палатаси депутатлари ўз ваколатлари даврида илмий ва педагогик фаолиятдан ташқари ҳақ тўланадиган бошқа турдаги фаолият билан шуғулланишлари мумкин эмас.

Бироқ Сафар Остонов ҳозиргача илгаригидек «Ўзбекистон овози» ва «Голос Узбекистана» газеталарида бош муҳаррири лавозимида, яъни маош тўланадиган иккинчи жойда ишлашда давом этмоқда.

«Қонун ижодкори бўлган депутат Сафар Остонов Ўзбекистон фуқароси сифатида Ўзбекистон қонунчилигини ҳурмат қилиши лозим эмасми?!” дея писанда қилади Rost24 нашри.