Ҳоким: “Сўхни дунё харитасидан ўчираман!”

Тармоқда 2 июнь куни Фарғона вилояти ҳокими Шуҳрат Ғаниевники дея ишонилган аудиоёзув тарқалди. Унда давлат мулозими “Сўх туманини харитадан ўчириб қўяман!” дея норози фуқароларга дағдаға қилади.  

Бундан аввал Қирғизистон ва Ўзбекистон чегараси ҳудудида сув устида чиққан жанжал ортидан 1 июнь куни Сўхга борган бош вазир Абдулла Ариповдан Ғаниевнинг истеъфосини талаб қилишган эди.

Давлат харитасига ўзбошимча чизиқ тортмоқчи бўлган мулозимнинг гаплари тармоқ фойдаланувчилари томонидан янада ғазаб билан қарши олинди.

“Фарғона вилояти ҳокими Шуҳрат Ғаниевнинг: “Керак бўлса Сўхни харитадан ӯчиртириб ташлайман, Тожикистон билан Қирғизистонга бераман”, деган гапи агар ӯз тасдиғини топса, у ҳолда давлатни пароканда қилиш истаги мавжуд бӯлган Фарғона “президенти” масаласи юзасидан Ӯзбекистон президенти эндиликда уни мукофотлаш ҳақида ӯйлаши керак эмас, балки дӯппини бошдан олиб, жиддий, бошқача ӯйлашга мажбур бӯлиши шарт.

Чунки аниқ бир давлат таркибига кирадиган ҳудудни бошқа давлатга бериб юбориш билан нафақат вилоят ҳокими Ғаниев, ҳатто Ӯзбекистон президенти Мирзиёев ҳам таҳдид қилишга ҳақли эмас.

Ӯзбекистоннинг тақдири ер эгаси бӯлмиш туб халқ бир чеккада қолиб, ӯзингдан чиққан ёвларга, бир ҳовуч манманларга, ӯзибилармонларга, ӯзбошимча шахсларга қолгани аянчли, албатта”, дея ёзди блогер Рўзибой Азимий.

“Элтуз”га навбатдаги ҳажвий суратни жўнатган рассом Кирпи эса Фарғона ҳокимини 3-рейх ҳарбий каскасида акс эттирди.  

Eltuz.com