![](https://i1.wp.com/ky.kloop.asia/wp-content/uploads/sites/6/2022/11/IMG_6132.jpg)
22-ноябрда Ош — Раззаков жолунда автокырсык катталып, 8 адам мерт кетти. Бул тууралуу облустук ЖКККБдан билдиришти.
Маалыматка караганда, саат 19:30 чамасында трассада «Мерседес-Бенц Спринтер» менен «Опель Вектра» жеңил унаасы кагылыша кеткен.
Кырсыктын кесепетинен жеңил унаадагы 6 адам, «Мерседес-Бенц Спринтердеги» 2 адам каза тапкан.
Алдын ала маалымат боюнча, «Опель Вектрадагы» 6 киши бир үй-бүлөнүн мүчөлөрү болгон — алар Кадамжай районуна кызынын үлпөт тоюна бара жаткан.
Учурда териштирүү иштери жүрүүдө, бир адам ооруканада жатат.
19-ноябрда Бишкек — Ош унаа жолунун Капчыгай тилкесинде оор жүк ташыган «Скания» менен «Форд Транзит» үлгүсүндөгү кичи автобус кагышып, алты киши каза болгон. Кичи автобус каршы тилкеге чыгып кетип, оор жүк ташуучу унаа менен кагыша кеткен.
ИИМдин Жол кыймылынын коопсуздугун камсыздоо башкы башкармалыгынын маалыматы боюнча, 2022-жылдын башынан бери Кыргызстанда жол кырсыгынын кесепетинен 477 адам каза болгон, анын 79у жаш балдар.