ထိုင်းမှာ နေ့လယ်ပိုင်း အရက်သောက်ရင် ဒဏ်ရိုက်ခံရမယ့် ဥပဒေ စတင် အသက်ဝင်

ထိုင်းနိုင်ငံမှာ အသက်ဝင်လာတဲ့ ဥပဒေသစ်အရ အများနဲ့ သက်ဆိုင်တဲ့ ဧရိယာတွေမှာ ခွင့်ပြုချိန် ပြင်ပ အရက်သောက်ရင် ဒဏ်ငွေဆောင်ရတော့မယ်လို့ သိရပါတယ်။

အရက်သေစာ ထိန်းချုပ်ရေးဆိုင်ရာ ဥပဒေသစ်ဟာ နိုဝင်ဘာ ၈ ရက်နေ့မှာ စတင် အသက်ဝင်ပါတယ်။ ထိုင်းက စူပါမားကက်တွေ၊ စျေးဆိုင်တွေမှာ နေ့လယ် ၂ နာရီကနေ ၅ နာရီအတွင်း ကန့်သတ် ပိတ်ပင်ထားမှုဟာ ၁၉၇၂ ခုနှစ်ကတည်းက ဥပဒေ ရှိထားပြီးသားပါ။ ဒါပေမဲ့ ဥပဒေ အသစ်ကတော့ အဲဒီ အချိန်ကာလအတွင်း အရက်သောက်မှုကိုပါ ကန့်သတ်လာမှာ ဖြစ်ပါတယ်။

တားမြစ်ချိန်အတွင်း တားမြစ်ထားတဲ့ နေရာတွေမှာ အရက်သောက်ရင် အနည်းဆုံး ဒဏ်ကြေး ဘတ် ၁၀၀၀၀ လောက် ပေးရမယ်လို့ ဥပဒေက ပြဋ္ဌာန်းထားပါတယ်။ ဒါဟာ အမေရိကန်ဒေါ်လာ ၃၀၀ ဝန်းကျင်လောက်နဲ့ ညီမျှပါတယ်။

ဒါပေမဲ့ ဥပဒေမှာ ခြွင်းချက်နဲ့ ခွင့်ပြုထားတာတွေတော့ ရှိပါတယ်။ ဟိုတယ်တွေ၊ လိုင်စင်ရ ဘားတွေ၊ ဖျော်ဖြေရေးဆိုင်ရာ ဝန်ဆောင်မှု လုပ်ငန်းတွေ၊ လေဆိပ်တွေမှာတော့ အချိန်ကန့်သတ်ချက် မရှိဘဲ အရက်ကို တည်ခင်းခွင့်၊ ရောင်းချခွင့် ရှိပါတယ်။ ဥပဒေသစ်ရဲ့ အဓိက ရည်ရွယ်ချက်ကတော့ သောက်သုံးသူတွေကိုယ်တိုင် ကိုယ့်ကိုယ်ကိုယ် ထိန်းသိမ်းကြစေဖို့ ဖြစ်ပါတယ်။

Public Service Announcement

အရက်ကြော်ငြာနဲ့ ပတ်သက်တဲ့ ဥပဒေတွေကလည်း ပိုပြီး တင်းကျပ်လာပါတယ်။ အရက်ကုမ္ပဏီတွေဟာ ထုတ်လုပ်တဲ့ ကုန်ပစ္စည်းရဲ့ အချက်အလက်တွေကို မှန်မှန်ကန်ကန် တိတိကျကျ၊ ဖော်ပြရမှာ ဖြစ်ပါတယ်။ နောက်ပြီး အနုပညာရှင်တွေ၊ လူသိထင်ရှား ပုဂ္ဂိုလ်တွေဟာ အရက်ကြော်ငြာခွင့် ရှိတော့မှာ မဟုတ်ပါဘူး။

တချို့ အရက်ဘားတွေ၊ စားသောက်ဆိုင် ပိုင်ရှင်တွေကတော့ ဥပဒေသစ်ကြောင့် လုပ်ငန်းထိခိုက်လာမှာကို စိုးရိမ်တယ်လို့ ပြောပါတယ်။

ဖောက်သည်တစ်ယောက်ဟာ နေ့လယ် ၂ နာရီ မတိုင်ခင်မှာ ဘီယာ ဝယ်လို့ရပေမယ့် ၂ နာရီ ကျော်သွားရင် ဆက်ပြီး သောက်ခွင့် မရှိတော့ဘူး ဆိုတာမျိုး ဖြစ်နေကြောင်း၊ ဒီတားမြစ်ချက်မျိုးဟာ စားသောက်ဆိုင် လုပ်ငန်းတွေကို သေချာပေါက် သက်ရောက် ထိခိုက်စေနိုင်ကြောင်း ထိုင်းစားသောက်ဆိုင်များ အဖွဲ့ချုပ် ဥက္ကဋ္ဌ ချာနွန် ကော့တ်ချာရုန်းက ပြောကြားခဲ့ပါတယ်။

သတ်မှတ်ချိန် ပြင်ပမှာ အရက်သောက်ရင် ဒဏ်ကြေးချမယ်ဆိုတဲ့ သတ်မှတ်ချက်ကြောင့် ရောင်းအား ထက်ဝက်လောက် ကျသွားနိုင်တယ်လို့ ဘန်ကောက် စားသောက်ဆိုင် တစ်ခုရဲ့ မန်နေဂျာ တစ်ယောက်က သတိပေးခဲ့ပါတယ်။

တချို့ကလည်း အကျင့်ပျက် အရာရှိတွေက အဲဒီဥပဒေကို လိုသလို အသုံးချပြီး သောက်သုံးသူတွေ၊ စီးပွားရေး လုပ်ငန်းတွေအပေါ် မမျှမတ ဆက်ဆံပြီး ဒဏ်ကြေးကောက်ယူတာတွေ ရှိလာမှာကို စိုးရိမ်နေကြပါတယ်။ အရက်ရောင်းချမှု ကန့်သတ်ချက်တွေကို ဖြေလျှော့ရေး တိုက်တွန်း တောင်းဆိုနေတဲ့ အတိုက်အခံ အမတ်တစ်ဦးဖြစ်တဲ့ တော်ဖီပေါ့ လင်မ်ဂျစ်ထရာခွန်ကတော့ ထိုင်းမှာ တစ်နေ့ကို ၂၄ နာရီ အရက်ရောင်းချခွင့် ရှိသင့်တယ်လို့ တိုက်တွန်းသွားခဲ့ပါတယ်။

ကိုးကား: Bangkok Post