په کندهار کې دوې سرچینې خبر ورکوي چې د دې ولایت په پنځلسمې حوزې او ډنډ ولسوالۍ کې په دوو جلا پېښو کې یوه ۱۶ کلن هلک او یوې پېغلې نجلۍ ځانوژنه کړې او ژوند ته یې د پای ټکی ایښی دی.
یوه سرچینه وايي چې نن چهارشنبه تر غرمې وروسته د ښار د پنځلسمې حوزې اړوند د یخکاریز سیمه کې یوه ۱۶ کلن هلک له خپل پلار سره تر جنجال کولو وروسته ځان زندۍ کړی او ژوند ته یې د پای ټکی ایښی دی.
په ورته وخت کې یوه بله سرچینه وايي چې د دې ولایت د ډنډ ولسوالۍ په شېر سرخ سیمه کې یوې ۲۰ کلنې نجلۍ ځان ځړولی دی.
دغه سرچینه وايي چې وژل شوې نجلۍ اصلاً د کندهار ولایت د ارغنداب ولسوالۍ اوسېدونکې وه.
که څه هم د دغو دواړو ځانوژنو د پېښو اصلي لاملونه نه دي په ډاګه شوي، خو تر ډېره دغه ډول پېښې د اقتصادي ستونزو او کورني تاوتریخوالي له امله رامنځته کېږي.
