طالبانو او روسیې د ۱۰۳ میلیونه امریکايي ډالرو په ارزښت ۱۵ سوداګریز هوکړهلیکونه لاسلیک کړي، چې له مخې به یې افغانستان له روسیې درمل، غنم او د پخلي غوړي وارد او دغه هېواد ته به انار او نورې تازه مېوې صادر کړي.
د افغانستان د صنعت او سوداګرۍ وزارت په خبرپاڼه کې ویلي، دغه هوکړهلیکونه د پنجشنبې په ورځ کابل ته د روسیې د لومړي وزیر د مرستیال الکسي اوورچوک په مشرۍ د یوه لوړپوړي پلاوي د سفر پر مهال، د دواړو هېوادونو د خصوصي سکټورونو ترمنځ په یوه سوداګریز کنفرانس کې لاسلیک شوي دي.
د راپورونو له مخې، کابل ته د روسي پلاوي د سفر پر مهال د طالبانو او روسیې چارواکو د سوداګرۍ، پانګونې او اقتصادي همکاریو پر پراختیا هم خبرې کړې دي.
د دغو خبرو یوه مهمه برخه د افغان کرنیزو محصولاتو لپاره د روسیې بازار ته د لاسرسي اسانتیا او د دواړو هېوادونو ترمنځ د سوداګریزو اړیکو پیاوړتیا وه.
روسیې په وروستیو کلونو کې له افغانستان سره د سوداګرۍ پراختیا ته لېوالتیا ښودلې او د خوراکي توکو، درملو، انرژۍ او ترانسپورټ په برخو کې یې د همکاریو د زیاتوالي موضوع مطرح کړې ده. په ورته وخت کې افغان سوداګر هڅه کوي چې د هېواد کرنیزو محصولاتو، په ځانګړي ډول انارو او نورو تازه او وچو مېوو ته په بهرنیو بازارونو کې زمینه برابره کړي.
د سوداګرۍ د پراختیا ترڅنګ، د افغانستان لپاره د صادراتو د زیاتوالي، د ترانسپورټي لګښتونو د کمولو او د ګمرکي چارو د اسانتیا موضوعات هم مهم بلل کېږي؛ ځکه د افغان محصولاتو صادرات د وارداتو په پرتله محدود دي.
اقتصادي شنونکي په دې باور دي چې د دغو هوکړهلیکونو اغېز به هغه مهال څرګند شي چې لاسلیک شوې ژمنې په عملي سوداګریزو راکړو ورکړو بدلې شي او افغان سوداګر وکولای شي خپل محصولات په منظم ډول د روسیې بازار ته ورسوي.
د ۱۰۳ میلیونه ډالرو په ارزښت د دغو هوکړو لاسلیک د کابل او مسکو ترمنځ د اقتصادي اړیکو د پراختیا په لړ کې نوی ګام بلل کېږي؛ خو د هوکړهلیکونو د عملي کېدو څرنګوالی او د سوداګرۍ د پیل مشخص مهالوېش لا نه دی روښانه شوی.
دا اړیکې په داسې حال کې پراخېږي چې روسیې د طالبانو حکومت په رسمیت پېژندلی، خو د امریکا په ګډون د نړۍ بل هيڅ هېواد لا هم دا حکومت په رسمیت نه دی پېژندلی.
