Azərbaycan xüsusi xidmət orqanları Gəncə hadisələrində şübhəli bilinən bir neçə nəfəri son günlərdə qətlə yetirib. Rəsmi açıqlamalarda həmin şəxslərin onları həbs etmək üçün keçirilən əməliyyat zamanı silahlı müqavimət göstərdikləri üçün öldürüldükləri deyilir. Öldürülən şəxslərdən biri də Müsəlman Birliyi Hərəkatının (MBH) fəalı Sərxani Ağa Hüseyn oğludur. MBH həm bu qətl, həm də rəsmi qurumların təşkilatı Gəncə hadisələrinə bağlamaq cəhdi ilə bağlı bəyanat verib.
Bəyanatda deyilir ki, hakimiyyət MBH-ni meydana çəkmək üçün Gəncə hadisələrini onunla əlaqələndirmək istədi, lakin hərəkatın təmkin və səbri buna imkan vermədi. Bununla belə Gəncə hadisələrinə görə MBH üzvləri hədəf alınmaqdadır.
MBH bildirir ki, Sərxani Ağa Hüseyn oğlu hərəkatın fəal üzvü olub, bütün tədbirlərdə, aksiyalarda yaxından iştirak edib.
MBH Gəncə hadisələrində şübhəli bilinənlərin, o cümlədən Sərxani Ağanın öldürülməsini cəmiyyətdə xof yaratmaq cəhdi kimi qiymətləndirir. “Hələ Nardaran hadisələri zamanı saxta ittihamlar irəli sürülərək, guya hərəkat silahlı müqavimət göstərmişdir deyə, hərəkatın fəal üzvlərini şər böhtanla həbs etmişdilər. Bu gün də Gəncə hadisələri ilə əlaqədar insanları qətlə yetirirlər. Guya həbs etmək istəyərkən silahlı müqavimət göstəriblər. Hərəkatın fəal üzvü şəhid Sərxani Ağa Hüseyn oğlunu da vəhşicəsinə qətl edib, əlinə silah verib, şəklin çəkərək paylaşdılar. Artıq bütün xalq bilir ki, bu hadisə də qurama və xalqda xof yaratma cəhdidir”, – deyə bəyanatda qeyd olunur.
MBH Sərxani Ağanın meyitinin dərhal ailəsinə verilməsini və bu işdə günahı olanların cəzalandırılmasını tələb edir.
