Президент қизи бўлгани учун лавозим олдими?

Президентнинг тўнғич қизи Саида Мирзиёева 15 апрель куни Ахборот ва оммавий коммуникация агентлиги раҳбари ўринбосари этиб тайинлангани ортидан матбуотда ва ижтимоий медиада кўпроқ кўрина бошлади.

Хусусан, 20 апрель куни Бўка туманида бўлган Саида Мирзиёева сафари чоғи туман мулозимлари президент қизини муносиб кутиб олишга ошиғич ҳозирлик кўришгани ҳақида матбуотда ёзилди.

Саида Мирзиёева президент Мирзиёевнинг ёшларни китоб ўқиш, бадан чиниқтириш, интернетдан фойдаланиш, санъатгга қизиқтириш, хотин-қизларни иш билан таъминлаш ташаббусларини кенг ёйиш учун “эл ичига юришлар” қилаётгани билдирилмоқда.

Худди бир вақтлар мамлакатнинг олдинги президенти Ислом Каримовнинг қизлари учун ўйлаб топилган маликалик рутбалари эндиликда очиқ бир тарзда президент Мирзиёевнинг қизлари учун татбиқ этилмоқда.

Президентнинг кенжа қизи Шаҳноза Мирзиёева 2018 йилнинг январида мактабгача таълим вазири ўринбосари этиб тайинланган эди.

Янги рутбалардан президент Шавкат Мирзиёнинг куёвлари ҳам четда қолишмади.

Хусусан, президент Мирзиёевнинг катта куёви, Саиданинг эри Ойбек Турсунов Президент аппарати Ишлар бошқармаси бошлиғи ўринбосари этиб тайинланган, кичик куёви, Шаҳнозанинг эри Отабек Умаров эса қайнатасининг тансоқчилари бошлиғи лавозимини эгаллаган.

Eltuz.com