Чироқчида айиқни ўлдиришиб, мурдасини таҳқирлаб расмга тушишди

Қашқадарëнинг Чироқчи тумани Тутли маҳалласида 28 май куни маҳаллий овчи айиқни отиб ўлдирди.

Бу ҳақда Nuz. Uz нашри Ўзбекистон Бош прокуратураси матбуот хизматига таяниб маълум қилди. Бундан олдин ижтимоий тармоқларнинг ўзбек сегментида “айиқ жасадини тахқирлаган ўзбек йигити” расми тарқалган ва сегмент ғазабига нишон бўлган эди.

Бош прокуратура маълумотига кўра¸ айниқни чироқчилик овчи Қаҳрамон Сулаймонов 16 калибрли ИЖ-17 ов милтиғи билан отиб ўлдирган:

“28 май куни Қашқадарëнинг Самарқанд вилоятига қўшни Тутли қишлоғига айиқ оралагани аҳолини қўрқитган.

Ўша куни қишлоқ турғунлари Ҳасан Тўраев¸ Рустам Сулаймонов ва Ҳайдар Очилов қурол сақлашга расман изни бор овчи Қаҳрамон Сулаймоновни чақириб, айиқни оттиришган”.

Ана шундан кейин Чироқчи тумани ИИБ ходими айиқ ўлигини туман марказига олиб келган.

Ветеринария хизмати айиқнинг қутурган ëки қутурмаганлигини текшириш учун жасадни қабул қилиб олган.

“Қизил китоб”га кирган айиқни отиб ташлаш ҳодисасини ўрганаëтган терговчилар “айиқполвонни ўлдирмаслик” мумкин эди, деган версияда ҳам жон борлигини айтишган.

Чунки айиқ аҳоли яшайдиган жойдан 20 метр узоқда ўлдирилган.

“Айиқ ўлдирувчилар” селфиси тармоқда тарқалиб ижтимоий медиа юзерлари ғазабига нишон бўлди.

Ўзбекистон қонунчилигида ўлган айиқ мурдасини таҳқирлаганларга жазо белгиланмаган.

Кўп ҳолларда “Қизил китоб”га кирган ноëб ҳайвонларни ҳавасга ўлдирганлар Ўзбекистонда жазоланмай қолади.

Дунëдаги энг сўнгги турон йўлбарси 1949 йили Ўзбекистоннинг Беруний туманида маҳаллий овчи тарафидан отиб ўлдирилганида бу овчи фахрий нишон билан тақдирланган эди.

Eltuz.com