Мустақиллик куни Тошкентда давлат байроқлари ўғирланди

Мустақиллик байрами нишонланган 1 сентябрь кечаси, Тошкент расмийларига кўра, шаҳар кўчаларига ўрнатилган байроқлардан 2000 тадан ортиғи ўғирланган. Етказилган зарар миқдори 142,6 млн сўмни ташкил этди, дея хабар берди газета.уз нашри пойтахт ҳокимлиги матбуот хизмати маълумотидан иқтибос келтириб.

Ижтимоий тармоқларда номаълум шахсларнинг симёғочга осиғлиқ байроқни ўғирлаётгани, бир гуруҳ йигитларнинг машиналарига байроқ осиб, йўл ҳаракати қоидаларини бузган ҳолда кўчада тиқин ҳосил қилиб “байрам қилаётгани” акс этган видеолар тарқалди.

“Биздан нарида “Спарк”, ичидан битта чувак тушди ва тезгина симёғочга маймун каби осилиб, у ердан иккита байроқни юлиб олди. Беш метр нарида ментларнинг машинаси турарди ва ментларнинг эмоцияси ноль эди”, дея ёзди Феликс исмли фейсбук юзери.

1 сентябр куни кузатилган бу каби ҳолатларни тармоқда кўпчилик тасдиқлади.

“Бу эсидан айрилганлар туни бўйи машиналарига байроқ осиб, тўда-тўда бўлиб юришди. Менинг гўдак ўғлим кечаси ваҳимадан чинқириб уйғонди. Агар улар патриот бўлишса, байроқларини кўтариб жимгина юришмайдими, нима кераги бор ҳамманинг тинчини бузиб, уйқу бермасдан”, дея ёзди яна бир фейсбук юзери Диана Беркутова.

Бошқа бир юзер Рамил Валиев эса бу оддий ўғирлик эканини иддао қилди.

“Бу ўғирлик. Давлат мулкини ўмариш. Бунинг учун тузукина “муддат” олиш мумкин”, дея изоҳлади воқеани Рамил Валиев фейсбук саҳифасида.

Ҳукумат нашрларига кўра, ҳар бир байроқнинг нархи 70 минг сўмни ташкил этади. Шундай қилиб, бир кечада давлатга етказилган зарар миқдори 142,6 млн сўмга етган.

Рассом Туз
Eltuz.com