Блогер Нафосат Оллошукуровани руҳий касалхонада даволаш муддати бир ойга узайтирилди

28 ноябрь куни фуқаролик ишлари бўйича Хоразм вилояти суди икки ой давомида руҳий шифохонада қолаётган блогер ва фаол Нафосат Оллошукуровани мажбурий даволаш муддатини яна бир ойга узайтирди.

Адвокат Умид Давлетовнинг сўзларига кўра, Нафосатни судда иштирок этиш учун шифохонадан олиб келишди.

«Ҳамма тарафлама тўлиқ савол-жавоблар бўлди. Хулоса берган экспертизадаги врачлар ҳам савол-жавоб қилинди. Куни кеча, 27 ноябрда у қайта комиссиядан ўтказилган ва яна бир ой “лечение” қилишга мажбур деган ҳулоса чиқаришган», деди адвокат “Элтуз”га.

Блогер Нафосат Оллошукурова 26 сентябрдан буён Урганч шаҳридаги руҳий шифохонада мажбурий даволанишда қолмоқда.

Тиббий-маслаҳат комиссияси раиси Қувондиқ Дурдиев биринчи судда берган кўрсатмасида: “Нафосат Оллошукурова даволанишга муҳтож, чунки “овқатдан бош тортиш”, “ўлиш истаги”, “ўзининг салбий томонларини яширишга уриниш” каби белгилар унинг руҳий ҳолати бузилиши аломатларидир”, дея билдирган эди.

Бу қарордан аввал Нафосат Оллошукурова 22 сентябрь куни журналист Маҳмуд Ражаб ҳимоясига уюштирилган норозилик акциясидаги иштироки учун 10 кун маъмурий ҳибсга тортилган эди.

Eltuz.com