Ўзбекистон ҳукумати хорижлик журналистларни тақиқлаб ўз обрўсини йўқотмоқда

Ўзбекистон президенти Шавкат Мирзиёев иккинчи муддатга қасамёд қилганидан бир кун ўтиб, матбуот эркинлигини ҳимоя қилишга ваъдалари ортидан, ҳукумат хорижлик журналист фаолиятини тақиқлади.

7-ноябр куни чегарачилар польшалик журналист Агнешка Пикулицкаяни Ўзбекистонга киришини тақиқлашди. Уни шу куни тунда Ўзбекистонга киришга ҳуқуқи йўқлигини айтиб Қозоғистон чегарасида қолдиришган.

“Журналистикада мен ҳар доим адолатли ва холис бўлишга ҳаракат қиламан. Инсон ҳуқуқлари ва адолатсизлик ҳақидаги хабарларим мени шундай кўргиликларга етаклайди, деб ҳеч ўйламагандим”, деди у Eurasianet нашрига берган интервьюсида.

Пикулицкая Ўзбекистонда 30 кун визасиз қолиш талаби туфайли «кирди-чиқди» амалини бажариш учун чегарани кесиб ўтган. У аввалроқ мамлакатни тарк этган ва кейин дарҳол янги визасиз режимни бошлаш учун қайта киришга ҳаракат қилган, аммо бу сафар унга киришга рухсат берилмаган.

Афтидан ўзбек расмийлари «ёмон матбуот»ни мамлакатга киритмаслик учун президентлик сайловлари тугашини кутишган, дея ёзади Eurasianet нашри.

«Сўнгги уч йил давомида мен Ўзбекистонда яшадим ва бу юрт менинг ўз уйимга айланди. Ҳеч бўлмаганда нарсаларим, кийим-кечакларимни йиғиштириб олишимга рухсат беришмагани жуда аламли ва адолатсиздир» деди журналист ўз интервьюсида.

У Твиттерда Тошкентдан учишга 9-ноябрда руҳсат этишлари ҳақида ёзган эди.

Пикулицкая учун амалдорлар билан бундай тўқнашув илк бор юз бераётгани йўқ. «Элтуз» жорий йилнинг февралида ёзганидек, ўзбек расмийлари унинг журналистик аккредитатсиясини узайтиришни рад этишган. Кейинчалик эса уни мамлакатнинг ички ишларига аралашиш, “фуқаролар шаъни ва қадр-қимматини камситиш”, “миллий ва диний адоватни тарғиб қилиш”да айблашган эди.

Пикулицкаянинг ўзи буни Ўзбекистондаги нозик масала бўлган ЛГБТга мансуб шахслар ҳақидаги репортажи учун қасд олиш дея ҳисоблашини айтади.

Мустақил сиёсий таҳлилчи Алишер Илҳомов ўзининг фейсбукдаги саҳифасида воқеа юзасидан муносабат билдирди:

«Бу воқеа Ўзбекистон расмийларининг журналистлар, блогерлар ва фаолларга, шунингдек панада қолишга мажбур бўлаётганларга муносабати ҳақида ўзимизни алдамаслик кераклигининг яна бир тасдиғидир.

Ўзбекистон расмийлари зарарсизлантиришга муваффақ бўлган мамлакатдаги коррупция ва инсон ҳуқуқлари бузилиши танқидчиларини ёки режим билан ҳамкорлик қилишга, у билан парда ортидаги келишувларга рози бўлганларнигина тан олади» дея ёзди Илҳомов.

Eltuz.com