Туркманистонлик талабалар ўз юртига қайта олмаяпти

Туркманистон ҳукумати карантин қоидалари сабаб ўз талабаларини мамлакат ҳудудига киритмаяпти. Талабалар чегара пунктида қолиб кетган ва бир неча кундирки, ўз юртига қайта олмай ҳалак. 

Маълум бўлишича, “Олот-авто” чегара пунктида туркманистонлик 11 нафар талаба юртига кира олмай ўтирибди. Улар ҳозир ўша ердаги автобус бекатлардан бирига жойлашиб, ноқулай шароитларда яшашга мажбур бўлмоқда. 

Талабаларни Туркманистонга қайтишга нима мажбур этди? Гап шундаки, 2020 йилда иқтисодиётнинг ёмонлашуви ва валюта дефицитининг олдини олиш учун халқаро карталар орқали валюта ўтказишга чеклов қўйилган. 

Шундан сўнг хорижда ўқувчи талабаларнинг молиявий аҳволи ёмонлаша бошлаган. 2021 йилнинг ўзида туркманистонлик 170 дан ортиқ талаба ўзлари ўқиётган университет маъмуриятига ишга жойлаштириш бўйича илтимос билан чиқишган. 

Бухоро педагогика коллежи талабаси Б.Султиева онасининг вафоти сабаб молиявий кўмакдан маҳрум бўлган, онасининг таъзиясига боришга ҳатто тақиқ қўйилгани сабаб ўз жонига қасд қилган. 

Туркманистонлик 600 дан зиёд талабани қамраб олган “Turkmen students in Uzbekistan” номли телеграм гуруҳи аъзолари ўз мамлакати ҳукуматининг бундай ҳаракатлари ўта салбий баҳоланган.  

Бу каби ҳолат биринчи марта рўй бераётгани йўқ. 2020-2021 йил давомидан туркман талабалар 4 марта ўз юртларига қайтишга ҳаракат қилишган, бироқ бари самарасиз якунланган. 

Туркманистон ҳукумати фуқароларининг ҳар қандай мурожаатларини беэътибор қолдирмоқда. Талабаларга бундай совуқ муносабатни эса карантин меъёрлари ваъжи билан бекитишга ҳаракат қилмоқда. 

Таъкидлаш жоизки, Туркманистон ҳудудида карантин чоралари кучайтирилган ҳолда қолаётган бўлса-да, мамлакатда коронавирусга чалинган бирорта бемор расман рўйхатга олинмаган. Шунга қарамай, мамлакатга Россиядан “Sputnik V” ҳамда “ЭпиВакКорона” вакциналари олиб келинди. 

Фуқаролари чегара пунктида оғир шароитларда қолаётган бир пайтда Туркманистон ҳукумати эски кийим кияётган фуқаролар билан оммавий курашга киришган.

Вазият шундай тус оладиган бўлса, талабалар “Олот-авто” чегара пунктида пикет уюштиришгача боришмоқчи. 

Aгар Туркманистон ҳукумати томонидан зарурий чоралар кўрилмаса, Ўзбекистон Республикаси Президентига очиқ мурожаат қилишни ҳам режалаштиришган.

Eltuz.com