Нафосат Оллошукурова психдиспансердан озод қилинди. У сайлов учун гаровга олинганмиди?

Хоразмдаги психдиспансерда уч ой ушлаб турилган блогер Нафосат Оллошукурова 28 декабрь куни рухий касалхонадан чиқарилди.

Элтуз мухбирининг хабар беришича, “сайлов бўлиб ўтганидан кейин ташкил қилинган махсус комиссия Оллошукурованинг бошқа даволанишга эҳтиёжи йўқ” деб топган.

28 декабрь куни Нафосат Оллошукурова касалхонадан чиқибоқ Тошкентга қараб йўлга чиқди. Тошкентда уни эгизак қизлари ва ота онаси кутмоқда.

Оллошукурова 23 сентябр куни адолат излаб Хоразмдан Тошкентга, ИИВ вазири билан учрашиши учун пиёда йўлга чиққан шоир ва журналист Маҳмуд Ражабнинг ҳаракатларини ёритгани ортидан 10 кунга қамалганди.

Қамоқ жазосини ўтагач, озод қилинмай, руҳий шифохонага ётқизилган блогер Оллошукурова мамлакатда энг кўп қизиқиш билдирилган фигурага айланди.

Халқаро ташкилотлар, Бош қароргохи Нью Йоркда жойлашган журналистларни ҳимоя қилиш ташкилоти, Amnesty international, Cotton Campaign каби халқаро ташкилотлар Нафосат Оллошкуровани озод қилишни Ўзбекистон ҳукуматидан талаб қилиб чиқишган эди.

Cуратда: Нафосат Оллошукурова; унинг ота онаси ва қизлари.

Eltuz.com