Ош облусундагы Кара-Суу районунун тургунун тапанча менен коркутуп, акча талап кылган шектүү кармалды. Бул тууралуу 13-майда Ош облусттук ички иштер башкармалыгы билдирди.
Маалыматка ылайык, 2-май күнү милицияга Кара-Суу районунун тургуну белгисиз киши тапанча менен коркутуп акча талап кылганын айтып кайрылган.
![](https://i1.wp.com/ky.kloop.asia/wp-content/uploads/sites/6/2023/05/WhatsApp-Image-2023-05-13-at-15.45.46-1.jpeg)
![](https://i1.wp.com/ky.kloop.asia/wp-content/uploads/sites/6/2023/05/WhatsApp-Image-2023-05-13-at-15.45.47.jpeg)
![](https://i1.wp.com/ky.kloop.asia/wp-content/uploads/sites/6/2023/05/WhatsApp-Image-2023-05-13-at-15.45.46-2.jpeg)
Бул боюнча «Опузалап акча талап кылуу» беренеси менен кылмыш иши козголуп, ыкчам иликтөө иштери жүргүзүлгөн.
Жабырлануучу милиция кызматкерлери менен даярданып, белги коюлган акчаларды шектүүгө берген. Натыйжада кылмышка шектелип Кара-Кулжа районунун тургуну кармалган.
«Далил буюм катары 20 миң сом өлчөмүндөгү акча каражаты шектүүнүн баштыгынан алынды. Мындан сырткары үйүн тинтүү учурунда белгисиз үлгүдөгү бир даана тапанча, 1 даана ок кутучасы, 4 даана 9 миллиметр калибрдеги октор табылды», — деп жазылат билдирүүдө.
Милициядан далилдердин негизинде шектүү кылмышты толугу менен мойнуна алганын белгилешти. Ал эми куралдардын үлгүсүн так аныктоо үчүн жана атууга жарактуулугун текшерүү максатында соттук-баллистикалык экспертиза дайындалды.
Шектүү 2 айга камакка алынып, учурда тергөө уланууда.