ရှမ်းပြည်နယ်မြောက်ပိုင်းတွင် ကျောက်မဲမြို့ရှိ လက်ကျန်စစ်စခန်းများကို လက်နက်ခဲယမ်းဖြည့်တင်းရန်၊ တအာင်း/ပလောင်တပ် TNLA နှင့် မဟာမိတ်များ၏ ပြင်းထန်သော ထိုးစစ်ကို ခုခံရန် စစ်ကောင်စီက လေတပ်ကို အားပြုနေသည်ဟု မြေပြင်စစ်ရေးသတင်းအရင်းအမြစ်တို့က ဆိုသည်။
ကိုးကန့်တပ် MNDAA က ထိန်းချုပ်ထားသည့် လားရှိုးမြို့နှင့် TNLA ထိန်းချုပ်ထားသည့် နောင်ချိုမြို့တို့၏ ကြားတွင်ရှိသည့် ကျောက်မဲမြို့တွင် စစ်ကောင်စီတပ်ဖွဲ့ဝင် ၃၀၀ ကျော်နှင့် တပ်မိသားစုဝင်များ ရှိနေနိုင်သည်ဟု ၎င်းတို့က ခန့်မှန်းကြသည်။
မြို့မြောက်ဘက် နှစ်မိုင်ခန့်အကွာတွင် အမှတ် ၁ စစ်ဆင်ရေးကွပ်ကဲမှုဌာနချုပ် (စကခ)၊ အမှတ် ၅၀၁ နှင့် ၅၀၂ ခြေမြန်တပ်ရင်း (ခမရ) တို့၏ ဌာနချုပ်များ ကျန်ရှိသည်။
လေတပ်သည် TNLA နှင့် မဟာမိတ်တို့ ရှိနေနိုင်သည်ဟု ယူဆသည့် ထိုစခန်းသုံးခုအနီးတစ်ဝိုက်ကို ယမန်နေ့က ၇ ကြိမ်ဗုံးကြဲခဲ့သည်၊ ခမရ-၅၀၁ နှင့် ခမရ-၅၀၂ တို့ထဲသို့ လက်နက်ခဲယမ်းများ ၁၃ ထုပ် လာရောက်ကြဲချပေးခဲ့ကြောင်း TNLA က ယမန်နေ့ ညတွင် ထုတ်ပြန်ထားသည်။
“မနေ့ညသန်းခေါင်မှာ ဂျက်ဖိုက်တာလာလိုက်၊ Y-12 လာလိုက်၊ ဆက်တိုက်ဗုံးလာကြဲတယ်၊ တစ်ညလုံးပဲ။ ဒီမနက်လည်း ဂျက်ဖိုက်တာ နှစ်စီးနဲ့ ၆ ကြိမ်ကျော်လောက် ဗုံးလာကြဲသွားပြီ” ဟု ကျောက်မဲမြို့တွင်း ရောက်နေသည့် TNLA နှင့် နီးစပ်သူတစ်ဦးက ပြောသည်။
“ခမရ-၅၀၁၊ ခမရ-၅၀၂ တပ်ရင်းထဲကနေ အတွဲလိုက်ဒုံးတွေ ပစ်လို့ ပြည်သူ့နေအိမ်တစ်လုံးလည်း မီးလောင်ပျက်စီးသွားတယ်“
ခမရ-၅၀၁ ၏ စိုးမိုးကုန်း ပတ္တမြားတောင်စေတီနှင့် ခမရ-၅၀၂ ၏ စစ်ဗျူဟာအရ အရေးကြီးသည့် ရန်အောင်မြင်ဘုရားကုန်းတို့ကို TNLA က သိမ်းပိုက်ထားနိုင်ပြီဖြစ်ပြီး ခမရ-၅၀၂ တပ်ရင်းဝင်းအတွင်းထိ ထိုးဖောက်ဝင်ရောက်နိုင်ပြီဖြစ်ကြောင်းလည်း ၎င်းက ဆိုသည်။
ကျောက်မဲခံစစ်ကို ကွပ်ကဲနေသူမှာ စကခ-၁ ဒုတိယဌာနချုပ်မှူး ဗိုလ်မှူးကြီးအောင်ခိုင်မိုးဖြစ်သည်။
ဌာနချုပ်မှူး ဗိုလ်မှူးချုပ်မျိုးမင်းထွေးကိုမူ လားရှိုးကို အကြီးအကျယ် စစ်ထိုးခဲ့သည့် ကိုးကန့်တပ် (MNDAA) က ဖမ်းဆီးရမိထားကြောင်း သတင်းထုတ်ပြန်ထားသည်။
ယနေ့ ဇူလိုင်၅ တွင် မြို့အနီး ပစ်ခတ်သံများ ဆက်လက်ကြားနေရသော်လည်း ကျောက်မဲမြို့ပေါ် နံနက်ခင်းစျေးများ ပုံမှန်ဖွင့်လှစ်ထားကြပြီး ဒေသခံသွားလာလှုပ်ရှားမှုများရှိနေကြောင်း သိရသည်။
လတ်တလောတွင် မြို့ပေါ် ဖုန်းနှင့် အင်တာနက်လိုင်းများအားလုံးနှင့် လျှပ်စစ်ဓာတ်အား ပြတ်တောက်နေကြောင်း၊ သောက်သုံးရေ အလုအယက်ဝယ်ယူနေရကြောင်း သိရသည်။
ဇူလိုင်လဆန်းကတည်းက ကျောက်မဲမြို့ပေါ်ကို TNLA က ထိန်းချုပ်နိုင်ခဲ့ပြီး လက်ကျန်တပ်ရင်းများကို ပိတ်ဆို့ထားခဲ့သည်။ ဇူလိုင်တတိယအပတ်တွင် စစ်ကောင်စီတပ်က ရှမ်းပြည်နယ်တောင်ပိုင်းမှ စစ်ကူအင်အား ၃၀၀ ကျော် ကျောက်မဲမြို့သို့ စေလွှတ်ခဲ့သော်လည်း ထိုစစ်ကူများကို ရှင်းလင်းတိုက်ခိုက်နိုင်ခဲ့သည်ဟု သိရသည်။
ကျောက်မဲမြို့သည် ခရိုင်ရုံးစိုက်ရာမြို့ဖြစ်ပြီး ကျောက်မဲခရိုင်တွင် မြို့ ၆ မြို့ရှိသည့်အနက် နောင်ချို၊ နမ္မတူ၊ မိုင်းလုံနှင့် မိုင်းငေါ့မြို့တို့ကို TNLA က ထိန်းချုပ်ထားပြီဖြစ်သည်။
၁၀၂၇ စစ်ဆင်ရေး ဒုတိယလှိုင်းတွင် TNLA နှင့် ပူးပေါင်းတပ်များက ကျောက်မဲမြို့တောင်ဘက် မိုးကုတ်မြို့နှင့် မိုးမိတ်မြို့တို့ကို သိမ်းပိုက်ထားပြီး ကျောက်မဲမြို့ကို အလုံးစုံရရှိရေး ကြိုးပမ်းနေသည်။
ကျောက်မဲနှင့် ပတ်သက်ပြီး စစ်ကောင်စီက သတင်းထုတ်ပြန်ခြင်း မရှိသေးပေ။
လက်လွှတ်လိုက်ရသည့် လားရှိုးမြို့ အရှေ့မြောက်တိုင်းစစ်ဌာနချုပ်ကိုမူ ၎င်းတို့၏တပ်များက ရွပ်ရွပ်ချွံချွံ ခုခံခဲ့သည်ဟု စစ်ကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဇူလိုင် ၅ ရက်စွဲဖြင့် သတင်းထုတ်ပြန်သည်။
“အရှေ့မြောက်တိုင်းစစ်ဌာနချုပ်ရဲ့ ကွပ်ကဲမှုအောက် တပ်ရင်း/တပ်ဖွဲ့များအနေနဲ့ ရန်သူကို အစွမ်းကုန်ခုခံခဲ့ပါတယ်။ ရွပ်ရွပ်ချွံချွံ အစွမ်းကုန်တိုက်ပွဲဝင်ခဲ့ကြပါတယ်” ဟု သူက ဆိုသည်။
“အချို့သောရဲမေများဟာ စစ်သည်များနဲ့တန်းတူ မဆုတ်တမ်းတိုက်ပွဲဝင်ခဲ့ပါတယ်။ ရဲမေများ၊ မှီခိုသူမိသားစုဝင်များလည်း သေဆုံးခဲ့ရပါတယ်” ဟု သူက ဆက်ပြောသည်။
ရဲမေ ဆိုသည်မှာ စစ်သား၏ဇနီးမယားကို ခေါ်ဆိုခြင်းဖြစ်ပြီး စစ်တန်းလျားတွင် နေထိုင်စဉ် လက်နက်ကိုင် ကင်းစောင့်ခြင်း၊ သန့်ရှင်းရေး စသည့် အလုပ်များကို အခမဲ့လုပ်ပေးရသူများ ဖြစ်သည်။
