အမျိုးသားတွေကို အတင်းအကျပ်လုံခြုံရေးကင်းစောင့်ခိုင်းမယ့် အစီအစဉ်ကို စစ်ကောင်စီက စတင်ကျင့်သုံးတော့မှာ ဖြစ်ပါတယ်။ မန္တလေးအပါအဝင် ဒေသအချို့မှာ ကင်းသမားတွေ စတင်ရွေးချယ်နေပြီလို့ စစ်ကောင်စီခန့် အုပ်ချုပ်ရေးမှူးတွေဆီကနေ စုံစမ်းသိရပါတယ်။
ဒါဟာ ဗိုလ်ချုပ်နေဝင်းဦးဆောင်တဲ့ ဆိုရှယ်လစ်အစိုးရနဲ့ ဗိုလ်ချုပ်သန်းရွှေဦးဆောင်တဲ့ စစ်အစိုးရ လက်ထက်တွေက ရပ်ကွက်ထဲမှာ အရပ်သားတွေကို အလှည့်ကျကင်းစောင့်ခိုင်းတဲ့ စနစ်မျိုးကို မင်းအောင်လှိုင်က ပြန်လည်သွတ်သွင်းလိုက်တာပါ။
ပြီးခဲ့တဲ့ သြဂုတ်လ ၁၆ ရက်နေ့က ‘ပြည်သူ့လုံခြုံရေးနဲ့ အကြမ်းဖက်နှိမ်နှင်းရေး ဗဟိုကြီးကြပ်မှုအဖွဲ့’ ကို စစ်ကောင်စီက ဖွဲ့စည်းပြီးတဲ့နောက် ‘ပြည်သူ့လုံခြုံရေးစနစ်’ လို့ နံမည်ရတဲ့ အစီအစဉ်ကို စလုပ်ဖို့ ကြိုးစားလာတာပါ။
နိုင်ငံတဝှမ်း စစ်မျက်နှာများစွာ ဖွင့်ထားရချိန်မှာ ရပ်ကွက်၊ကျေးရွာအလိုက် လုံခြုံရေးစနစ်တွေ တည်ဆောက်ရမယ်လို့ သြဂုတ်လ ၂၅ရက်နေ့က မန္တလေးရောက် စစ်ခေါင်းဆောင်က ပြောထားပါတယ်။
