သမ္မတရာထူးရယူပြီး တပ်ချုပ်ကိုပါ ထိန်းချုပ်မည့် မင်းအောင်လှိုင်၏ အာဏာမြဲရေး စီမံကိန်း

စစ်ဗိုလ်ချုပ်အသိုင်းအဝိုင်းတွင်  ‘သံသယများသူ’ဟုတံဆိပ်ကပ်ခံရသည့် ဗိုလ်ချုပ်မှူးကြီး မင်းအောင်လှိုင်သည် သူ၏တပ်ချုပ် ၁၅ နှစ်တာသက်တမ်းအတွင်း အာဏာတည်ဆောက်နေရသလို အခြားတစ်ဖက်တွင် သူ့အားဩဇာခံမည့်၊ ယုံကြည်စိတ်ချရမည့် သစ္စာခံ စစ်ဗိုလ်ချုပ်များကို ရှာဖွေ စုဆောင်းခဲ့ရသည်။

ထိုအထဲတွင် ဒုဗိုလ်ချုပ်ကြီး မိုးမြင့်ထွန်းနှင့် ကျော်စွာလင်းတို့သည် အာဏာသိမ်းပြီးနောက် စစ်ခေါင်းဆောင် အရေးအပေးဆုံး စစ်ဗိုလ်ချုပ်များ ဖြစ်လာခဲ့သည်။ စစ်တက္ကသိုလ် အပတ်စဉ် ၃၀ ဆင်းများအနက် အသက်အငယ်ဆုံးဖြစ်သူ ဒုတိယဗိုလ်ချုပ်ကြီး မိုးမြင့်ထွန်းကို တပ်ချုပ်၊ စစ်တက္ကသိုလ် အပတ်စဉ် ၃၅ ဆင်း ကျော်စွာလင်းကို ဒုချုပ်အဖြစ် စစ်ခေါင်းဆောင်က လျာထားခဲ့သည်။

သို့သော် မိုးမြင့်ထွန်းကို အဂတိမှုစွပ်စွဲချက်ဖြင့် ရာထူးဖြုတ်ချထောင်ချခဲ့ပြီးနောက်  ကျော်စွာလင်းသည် တပ်ချုပ်ဖြစ်ရန် အလားအလာအကောင်းဆုံးဟု စစ်ရုံးသတင်းရင်းမြစ်က ပြောသည်။

ရန်ကုန်မြို့တစ်ဖက်ကမ်း ဒလမြို့ဇာတိဖြစ်သူ ဗိုလ်ချုပ်ကြီး ကျော်စွာလင်းသည် စစ်ခေါင်းဆောင်၏ မြှောက်စားမှုဖြင့် စစ်တပ်အတွင်း အရေးကြီးရာထူးများကို ဆက်တိုက် ရလာခဲ့သည်။

၂၀၁၈ ခုနှစ် တွင် မန္တလေးအခြေစိုက် အလယ်ပိုင်းတိုင်းစစ်ဌာနချုပ် တိုင်းမှူးဖြစ်လာပြီး နှစ်နှစ်အကြာတွင် ဒုတိယဗိုလ်ချုပ်ကြီး၊ ထို့နောက် စစ်ထောက်ချုပ်ရာထူးအထိ တိုးမြှင့်ခံခဲ့ရသည်။

အသက် ၅၀ မပြည့်မီပင် ရှားရှားပါးပါး ဒုတိယဗိုလ်ချုပ်ကြီးဖြစ်လာကာ ရာထူးတိုး အမြန်ဆုံး စစ်သားတစ်ဦးဖြစ်လာသည့် ကျော်စွာလင်းကို မင်းအောင်လှိုင်က “သူ့အရိုက်အရာဆက်ခံဖို့ လမ်းခင်းနေတယ်” ဟု စစ်ဗိုလ်ချုပ်အသိုင်းအဝိုင်းတွင် စတင် သတိပြုမိခဲ့ကြသည်။

“ဘဏ္ဍာစိုး” ဟု စစ်တပ်အသိုင်းအဝိုင်းတွင် တင်စားကြသည့် စစ်ထောက်ချုပ်ရာထူးသည် စစ်ခေါင်းဆောင်အသီးသီးက မိမိအယုံကြည်ရဆုံးသူများကိုသာ ခန့်ထားလေ့ရှိသည့် ရာထူးဖြစ်သည်။ နိုင်ငံတဝန်းရှိ တပ်ပိုင်မြေများ အပါအဝင် စစ်တပ်၏ စီးပွားရေးလုပ်ငန်းများ၊ ပြည်ပဝယ်ယူရေးနှင့် ထောက်ပို့ဆိုင်ရာ ကိစ္စရပ်များကို ကြီးကြပ်ရသည့် အရေးပါသော ရာထူးလည်း ဖြစ်သည်။

ပြီးခဲ့သည့် ၂၀၂၅ ခုနှစ်အတွင်း စစ်ခေါင်းဆောင်၏ ရုရှားနှင့် တရုတ်နိုင်ငံ ခရီးစဉ်များတွင်လည်း ကျော်စွာလင်းသည် လက်ရုံးတစ်ဦးအဖြစ် အနီးကပ် လိုက်ပါခဲ့သည်။ ရန်ကုန်မြို့တွင် ပြုလုပ်သည့် တရုတ်နှင့် အိန္ဒိယနိုင်ငံ စစ်တပ်နှစ်ပတ်လည်နေ့ အခမ်းအနားများတွင်လည်း ကျော်စွာလင်း တက်ရောက်ခဲ့သည်ကို တွေ့ရသည်။

ကျော်စွာလင်းသည် စစ်ဆင်ရေးအတွေ့အကြုံ မရှိသည့် ‘စစ်မင်းသား’ ဟူ၍  စစ်ရုံးအသိုင်းအဝိုင်းတွင် နာမည်ကြီးသည်ဟု Myanmar Now စစ်ရုံးသတင်းရင်းမြစ်က ပြောသည်။ 

“တပ်ထဲမှာက စစ်တိုက်တာတော်တဲ့သူ၊ စစ်တိုက်တာ အတွေ့အကြုံရှိတဲ့သူကို စစ်သားချင်း အထင်ကြီးတာ။ ဒီကောင်တွေကတော့ လူကြီးနားမှာ အိတ်ဆွဲ၊ တံခါးဖွင့်လိုပေါ့ဗျာ။ ကိုယ်ရေးအရာရှိ အလုပ်ပဲ လုပ်ပြီးတော့မှ ရုံးပေါ်ကနေပဲ မြေပုံတုတ်ထောက်တွေနဲ့ ဆင်းလာတာဆိုတော့ အထင်မကြီးကြဘူး” ဟု ၎င်းကပြောသည်။

ကျော်စွာလင်းသည် ဗိုလ်ကြီးဘဝတွင် နအဖ စစ်အစိုးရ၏ ဒုစစ်ခေါင်းဆောင် ဒုတိယဗိုလ်ချုပ်မှုးကြီး မောင်အေး၏ ရုံး၌ တာဝန်ထမ်းဆောင်ခဲ့ဖူးသည်။ ထို့နောက် ပျဉ်းမနားအခြေစိုက် အမှတ် (၄၁၁) ခြေမြန်တပ်ရင်းတွင် တပ်ရင်းမှူး၊ တြိဂံတိုင်းစစ်ဌာနချုပ်လက်အောက်ရှိ တာချီလိတ်မြို့နယ်တွင် ဗျူဟာမှူး၊ နေပြည်တော်အခြေစိုက် အမှတ် (၆) စစ်ဆင်ရေးကွပ်ကဲမှုဌာနချုပ်တွင် တပ်မမှူး၊ စစ်ရုံးချုပ်တွင် စစ်ဦးစီး ဗိုလ်မှူးချုပ်အဖြစ် အဆင့်ဆင့် တာဝန်ထမ်းဆောင်ခဲ့သည်။

၂၀၁၇ ခုနှစ်က ရခိုင်ပြည်နယ်ရှိ ရိုဟင်ဂျာများကို ပစ်မှတ်ထား ရှင်းလင်းခဲ့သည့် စစ်ဆင်ရေးအတွင်း ကျော်စွာလင်းသည် စစ်ရုံးချုပ်တွင် စစ်ဦးစီးဗိုလ်မှူးချုပ်အနေဖြင့် ကွပ်ကဲခဲ့သည်ဟု ၂၀၂၁ အာဏာသိမ်းပြီးနောက် စစ်တပ်ကိုစွန့်ခွာလာသည့် CDM တပ်အရာရှိများဖြင့် ဖွဲ့စည်းထားသော စစ်ဘက်နှင့် လုံခြုံရေးရာ သုတေသနအဖွဲ့ (MDSI) က ဆိုသည်။

စစ်ဦးစီးဗိုလ်မှူးချုပ်ရာထူးမှာ တပ်ချုပ်နှင့် မြေပြင်တပ်မှူးများ၊ တိုင်းမှူးများကြား ဆက်သွယ်ချိတ်ဆက်ပေးရသည့် ရာထူးဖြစ်သည်။