“Dağıstan Səhəri” adlanan Telegram kanalı izləyicilərini xəbərdar edərək, onları Mahaçqalada yerləşən Dağıstanın əsas hava limanında “gözlənilməyən ziyarətçilərlə görüşə” çağırıb. Təyyarə yerli vaxtla saat 19:00-da aeroporta enəcəkdi.
Təyin edilmiş vaxtda yüzlərlə gənc oğlan hava limanına çatıb. Aeroportun təhlükəsizlik qüvvələrini əzib keçən kütlə uçuş-enmə zolağına daxil olub və hətta onlardan bəziləri aeroport binasının damına çıxmağa müvəffəq olublar. Onlar hava limanında yəhudi sərnişinləri axtarırdılar.
BBC “Dağıstan Səhəri”da paylaşılan mesajların izi ilə gedib. Biz də Telegramda antisemitik ritorikalar paylaşan və zorakılığa çağırış edən yerli kanallar aşkarladıq.
“Dağıstan Səhəri” Rusiya əleyhinə olan İslamçı kanaldır və Qafqazda “Moskvanın işğal rejiminə” son qoyulmasına dair çağırışları müdafiə edir. Kanal həmçinin Rusiyanın Ukraynadakı işğal müharibəsi ilə yanaşı, yerli hadisələrlə bağlı yenilikləri paylaşır.
Bundan əlavə, kanal Rtusiya istisna olmaqla, bir çox ölkələr tərəfindən terrorçu qruplaşma kimi tanınan Həması dəstəkləyərək İsrail-Fələstin münaqişəsi barədə də məlumatlar yayımlayır.
Hər kəsə açıq olan “Dağıstan Səhəri” kanalının bir neçə gün əvvəl 50 min izləyicisi var idisə, hazırda bu rəqəm 85 minə yaxınlaşır.
Bazar günü kanalın paylaşdığı yazılar təyyarəni tərk edən israilli sərnişinlərin qarşısını kəsmək üçün izdiham yaratmaq məqsədi ilə aeroporta gəlmək istəyənlərə təlimatlar da verib.
“İcazə verin onlar bir-bir çıxsınlar və onlardan İsraili lənətləmələrini istəyin. Əgər onlar İsraili lənətləməkdən imtina etsələr, hava limanını bağlayacağıq və oradan uzaqlaşmalarına imkan verməyəcəyik”, – kanalın paylaşdığı postlardan birində belə deyilir.
Kanal həmçinin izləyicilərini sərnişinlərin şəkillərini çəkməyə, onların mindiyi avtomobilləri təqib etməyə və beləliklə onların Dağıstandakı ünvanlarından ibarət siyahı hazırlamağa çağırıb.
Bir neçə gün əvvəl isə həmin kanal Mahaçqalada və digər şəhərlərdə insanları yürüyüşə dəvət edərək, onları “iki milyon müsəlmana dəstək” verməyə çağırıb. Anti-semitik mesajlar paylaşan “Dağıstan Səhəri” şəhər əhalisini evlərini yəhudilərə kirayə verməməyə səsləyib.
Bununla belə, biz əsas siyasi maraqları əks olunmayan, lakin zorakılığa dair çağırışlar edən digər Telegram kanalları da tapdıq və onların on minlərlə izləyicisi var.
Alış-veriş saytı olan “Avito”nun Telegram kanalında da Dağıstanda yaşayan və İsrail naminə mübarizə apardığı deyilən yəhudi ailəni hədəf alan mesajlar tapdıq.
İzləyici sayı 17 min olan Gorets kanalında isə insanları yerli yəhudiləri, eləcə də Dağıstana gələn yəhudiləri təqib etməyə cəsarətləndirən postlar mövcuddur.
Bazar ertəsi səhər saatlarında Telegramın sahibi Pavel Durov elan edib ki, “zorakılığı təbliğ edən kanallar bloklanacaq” və “Dağıstan Səhəri” kanalının bir postunun ekran görüntüsünü paylaşıb. Bundan bir qədər sonra kanal Telegramda mövcud olmasa da, yenidən axtarış sistemində tapmaq mümkün olub.
