اطلاعات روز: نورستان کې د طالبانو سیمهییز مسوولین خبر ورکوي، چې د لوی اختر په ورځو – شپو کې شاوخوا ۱۷۰ زره سیلانیانو د دغه ولایت له بېلابېلو سیاحتي سیمو او طبیعي جاذبو لیدنه کړې.
د نورستان د اطلاعاتو او کلتور ریاست لپاره د طالبانو رييس سمیع الحق حق بیان وايي، د لوی اختر په ورځو ـ شپو کې د کورنیو سیلانیانو ترڅنګ یو شمېر بهرني سیلانیان هم د دغه ولایت سیاحتي سیمو ته ورغلي وو او هلته یې خپلې اختریزې خوښۍ نمانځلې دي.
حق بیان زیاتوي، سیلانیانو ته یې د نورستان په مرکز پارون او یو شمېر نورو سیمو کې هوټلونه او نورې اسانتیاوې برابرې کړي او هڅه کوي په دې برخه کې لا نور ګامونه واخلي.
خو، نورستان ته یو شمېر ورغلي سیلانیان دې ولایت ته له غځېدلې خرابې لویې لارې شکایت کوي او نیوکه کوي چې طالبانو په وارـ وار خپلې کړې ژمنې نه دي پوره کړي.
دوی زیاتوي، چې د لارې د خرابوالي سربېره په دې ولایت کې سیلانیانو ته د مناسب هوټلونو نشتوالي دوی له ستونزو سره لاس او ګرېوان کړي او له کبله یې دې ولایت ته له تګ زړه توري شوي.
سیلانیان د طالبانو له رژیم غوښتنه کوي، چې په نورستان کې دې د لارې د جوړولو سربېره د هوټلونو، مېشتېدنې او تفرېح لازمې اسانتیاوې برابرې کړي، ترڅو سیلانیان د سیاحت پر مهال له ستونزو سره مخامخ نه شي.
دا په داسې حال کې ده، چې د روان کال د کوچني اختر په ورځوـ شپو کې هم لسګونه زره کورنیو او بهرنیو سیلانیانو د نورستان ولایت له سیاحتي سیمو او طبیعي جاذبو لیدنه کړې وه.