د افغانستان د اسلامي وحدت ګوند مشر محمد محقق په لوېدیځ کابل کې په یوه ښوونځي کې د شوې چاودنې په غبرګون کې ویلي، چې د دې پېښې مسؤلیت د طالبانو پر غاړه دی.
محقق نن سهار (سېشنبه، د زمري ۲۷مه) په یوه اعلامیه کې ویلي، چې طالبان د واکمنې ډلې په توګه مسؤلیت لري چې د خلکو د ژوند، مال او حیثیت ساتنه وکړي.
محقق ویلي: «دا خواشینوونکې پېښه، هغه هم د هغو ماشومانو په منځ کې چې یوازې له کتابچې او قلم سره سروکار لري، د پېښې د عاملانو د ظلم او بېرحمۍ څرګندونه کوي. او له شک پرته، ځکه چې واکمنه ډله ادعا کوي چې د هېواد پر ټولې خاورې بشپړ کنټرول لري، نو د دې ناورین مسؤلیت د هغوی پر غاړه دی؛ هغوی باید د خپلې تر کنټرول لاندې سیمې د خلکو د ژوند، مال او حیثیت ساتنه کړې وای.»
د افغانستان د اسلامي وحدت ګوند مشر د پېښې د څرنګوالي په اړه ویلي، چې نوموړي ته معلومات رسېدلي چې دوو موټرسایکلسورو کسانو دوه لاسي بمونه د ښوونځي دننه غورځولي دي.
پرون مازدیګر شاوخوا ۴:۳۰ بجې (دوشنبه، د زمري ۲۶مه) د کابل ښار د دشت برچي په مهدیه ښارګوټي کې، د اتلسمې امنیتي حوزې اړوند د «شمع هدایت» خصوصي ښوونځي په انګړ کې چاودنه وشوه.
ځايي سرچینو هم د پېښې له رامنځته کېدو وروسته په لومړیو ساعتونو کې ورته روایت وړاندې کړی و او ویلي یې وو چې یوه کس له بهر څخه د دغه ښوونځي انګړ ته چاودېدونکي توکي غورځولي دي.
طالبانو د پېښې رامنځته کېدل تأیید کړي، خو نور جزیات یې نه دي ورکړي. ویل کېږي چې په دې پېښه کې شاوخوا ۵۰ زدهکوونکي ټپیان شوي دي.
