د افغانستان د خبریالانو مرکز له طالبانو وغوښتل چې د «لاپیس» رسنیز مرکز ته د فعالیت د بیا پیل اجازه ورکړي.
دغه مرکز د جمعې په ورځ، د سنبلې په ۶مه، په یوه اعلامیه کې له طالبانو وغوښتل چې د رسنیزو فعالیتونو پر وړاندې محدودوونکي اقدامات او په هېواد کې د خپلواکو رسنیو د کمزوري کولو هڅې پای ته ورسوي.
د افغانستان د خبریالانو مرکز له طالبانو غوښتي چې «د لاپیس دفتر بېرته پرانیزي او کارکوونکو ته اجازه ورکړي چې له محدودیت او د نیول کېدو له وېرې پرته خپل فعالیتونه پیل کړي.»
د افغانستان د خبریالانو مرکز د خپلو سرچینو له قوله ویلي چې د «لاپیس» رسنیز مرکز د چهارشنبې په ورځ، د سنبلې په ۴مه، د طالبانو استخباراتو له لوري تړل شوی دی.
دغه مرکز ویلي چې طالبانو د کابل ښار د وزیر اکبرخان سیمې په ۱۲مه کوڅه کې د لاپیس دفتر د تړلو پر مهال د دغه دفتر تجهیزات، د کمپیوټرونو او د معلوماتو د زېرمه کولو ډیسکونو په ګډون، ضبط کړي او له ځان سره یې وړي دي.
د خبریالانو مرکز د طالبانو د استخباراتو د یوه کارکوونکي له قوله لیکلي چې ټاکل شوې د لاپیس رسنیز مرکز دوسیه له لا زیاتو څېړنو او تحقیقاتو وروسته محکمې ته ولېږل شي.
د چهارشنبې په ورځ د طالبانو له استخباراتو سره تړلې «هندوکش غږ» رسنۍ د لاپیس دفتر د تړل کېدو خبر ورکړی او ویلي یې دي چې د دغه بنسټ ځینې کارکوونکي له هېواده بهر دي او هغه کسان چې په هېواد کې ژوند کوي، تر څار او تعقیب لاندې دي.
د هندوکش غږ د راپور له مخې، طالبانو دغه رسنیز مرکز تورن کړی چې د نیمه لوڅو فلمونو لنډې صحنې، کنسرتونه او نور هغه تصویري مطالب یې خپاره کړي چې لوېدیځ سبک او نظریات ترویجوي.
د «لاپیس» رسنیز مرکز چې د «موبی ګروپ» اړوند دی، د رسنیزو محتواوو ترڅنګ د فلمونو او موسیقۍ څو خپرندویې شبکې، لکه «باربد»، «فضا»، «دریا» او «شمس» هم اداره کوي.
«موبی ګروپ» چې په اوو اسیايي او افریقايي هېوادونو کې یو فعال رسنیز شرکت دی، د افغانستان د وګړي سعد محسني په ګډون څو ونډهوال لري. دغه شبکې په کابل کې ګڼ رسنیز مرکزونه جوړ کړي، چې طلوع، طلوعنیوز، لمر ټلویزیونونه، آرمان او آراکوزیا راډیوګانې، د «کابورا» د دوبلاژ او رسنیزو محتواوو د تولید مرکز، د «باربد» د موسیقۍ د تولید او خپرولو مرکز، د «لاپیس» رسنیز مرکز او یو شمېر نور اړوند بنسټونه پکې شامل دي.
سعد محسني په تېرو پنځو کلونو کې څو ځله له نړیوالې ټولنې غوښتي چې له طالبانو سره «تعامل» وکړي.
د بېلګې په توګه، د روان لمریز کال د غبرګولي په میاشت کې، هغه په لندن کې په یوه غونډه کې د افغانستان د ښځو وضعیت «عادي» وباله، چې له امله یې د هېواد د وګړو، په ځانګړې توګه د ښځو او مدني ټولنې سخت غبرګونونه راوپارېدل.
