د «ټیلیګراف» ورځپاڼې راپور ورکړی چې د سکاټلنډ، وېلز او شمالي ایرلنډ لومړي وزیران یوه مهمه غونډه کوي، څو له بریتانیا څخه د خپلو سیمو د بېلتون لپاره پلان جوړ کړي.
دې بریتانوي رسنۍ په یوه راپور کې لیکلي چې دا غونډه نن (دوشنبه، ۲۳ د وږي) د وېلز په پلازمېنه کارډیف کې ترسره کېږي.
ټاکل شوې چې په دې غونډه کې د سکاټلنډ لومړی وزیر جان سویني، د وېلز لومړی وزیر رین اَپ ایئوروِرت او د شمالي ایرلنډ لومړۍ وزیره میشل اونیل ګډون وکړي.
ټیلیګراف لیکلي چې دغه مشران سره راټولېږي، څو د «ځانتعیین حق، خپلواکۍ او د اساسي قانون د بدلونونو» په اړه د ګډې همکارۍ خبرې وکړي او یو ګډ تفاهملیک هم لاسلیک کړي.
جان سویني د دغو دریو حکومتونو د اوسنیو مشرانو همغږي د بریتانیا څخه د بېلتون لپاره یو مهم فرصت بللی او ویلي یې دي چې د لومړي ځل لپاره سکاټلنډ، وېلز او شمالي ایرلنډ د خپلواکۍ پلوي لومړنیو وزیرانو له خوا رهبري کېږي.
هغه زیاته کړې چې «اوسنی وضعیت د دوام وړ نه دی» او ویسټمنسټر باید د بریتانیا له موجوده جوړښت وروسته د راتلونکي لپاره چمتووالی ونیسي.
د نننۍ غونډې په اړه سویني ویلي: «سبا په کارډیف کې لیواله یم چې د دغو ټاپوګانو له ګوټ ګوټ څخه له خپلو شریکانو سره د یوه غوره راتلونکي په اړه خبرې وکړم؛ او دا راتلونکی یوازې له خپلواکۍ څخه د یوه نوي پیل په کولو سره ممکن دی.»
د ټیلیګراف د راپور له مخې، د سکاټلنډ، وېلز او شمالي ایرلنډ اوسني مشران غواړي، که په دې اړه هوکړې ته ورسېږي، له بریتانیا څخه د بېلتون لپاره ټولپوښتنه ترسره کړي.
تر اوسه لندن د سکاټلنډ، وېلز او شمالي ایرلنډ د ملتپالو مشرانو د دې پرېکړې په اړه په رسمي ډول کومه څرګندونه نه ده کړې.
