Hazırda dövlət orqanlarında bir neçə boş məmur vəzifəsi var və onlara təyinatların nə vaxt reallaşacağı bəlli deyil. Bu təyinatlardan bəziləri birbaşa prezidentin səlahiyyətlərinə daxildir, bəzilərində isə İcra Hakimiyyəti başçıları təyinatlar etməlidir.
Boş qalan ən böyük məmur postu nazir vəzifəsidir. Belə ki, enrgetika naziri Natiq Əliyev bu ilin iyun ayının 8-də İstanbulda vəfat edib. Bundan sonra energetika naziri postuna təyinat olmayıb. Bu nazirliyin ləğv olunacağını proqonozlaşdıranlar da var. Amma bu məsələlər birbaşa prezidentin səlahiyyətinə daxildir və hansı qərarın veriləcəyini proqnozlaşdırmaq mümkün deyil.
Qaynarinfo.az xəbər verir ki, hazırda Prezident Administrasiyasında 3 şöbənin müdiri vəzifəsi boşdur. Bunlardan ikisi prezidentin iyunun 1-də imzaladığı sturuktur islahatları ilə bağlı sərəncamdan sonra boş qalıb. Daha bir şöbəsi bu zaman yaradılıb.
Boş qalan postlardan biri Prezident Administrasiyasının Humanitar siyasət məsələləri şöbəsinin müdiri vəzifəsidir. Bu vəzifəni son olaraq Fatma Abdullazadə tutub. Amma prezidentin iyunun 1-də imzaladığı sərəncamla ona vəzifə verilməyib.
Bununla yanaşı, həmin vaxtdan Millətlərarası münasibətlər, multikulturalizm və dini məsələlər şöbəsinin müdiri vəzifəsi boşdur. Bu postu tutan Kamal Abdullazadə sonradan Azərbaycan Dillər Universitetinə rektor təyin edilib.
İyunun 1-də imzalanan sərəncamla Prezident Administrasiyasında İnnovativ inkişaf və elektron hökumət məsələləri şöbəsi yaradılıb. Şöbəyə hələlik təyinat olmayıb.
Hazırda Yasamal rayon İcra Hakimiyyətinin başçısı vəzifəsi də boşdur. Son icra başçısı İbrahim Mehdiyev iyulun 1-də prezident İlham Əliyev tərəfindən vəzifəsindən azad olunub. Buna səbəb dövlət başçısının tapşırığının əksinə olaraq yenisi tikilmədən “Sovetski”dəki Hacı Cavad məscidinin sökülməsi olub.
Prezident İlham Əliyev iyulun 11-də Səfərbərlik və Hərbi Xidmətə Çağırış üzrə Dövlət Xidməti rəisinin həqiqi hərbi xidmətə çağrış üzrə müavini – Həqiqi hərbi xidmətə çağırış baş idarəsinin rəisi Novruzəli Orucovu işdən çıxarıb. Buna səbəb onun oğlunun avtobus sürücüsünü döyməsi olub.
Prezident İlham Əliyev iyulun 11-də Dövlət Sərhəd Xidmətinin Miqrasiya və Sərhəd Nəzarəti İdarəsinin rəisi Akif Şəfiyevi hərbi geyim forması daşımaq hüququ verilməklə həqiqi hərbi xidmətdən ehtiyata buraxıb. Dövlət başçısı həmçinin onu 3-cü dərəcəli “Vətənə xidmətə görə” ordeni ilə təltif edib. Bu posta da hələlik təyinat olmayıb.
Ötən ayın 26-da Biləsuvar rayon icra başçısının müavini, ictimai-siyasi və humanitar məsələlər şöbəsinin müdiri Xəyalə Qəmbərova işdən çıxarılıb. Onun yerinə hələ heç kim təyin edilməyib.
Ötən günlərdə isə Sumqayıt şəhər İcra Hakimiyyəti başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri Lalə Hacıyeva da işdən azad olunub. Bu posta təyinat olmayıb. Lalə Hacıyevanın isə H.Z.Tağıyev qəsəbəsinin icra nümayəndəsi təyin edildiyi bildirilir.
Oxunub: 1188
