AXCP sədri Əli Kərimli
Əziz həmvətənlər, dövlət müstəqilliyimizin bərpasının 30 illiyi münasibətilə hər birinizi ürəkdən təbrik edirəm.
70 illik Sovet işğalından sonra Azərbaycanımızın öz istiqlalına yenidən qovuşması tariximizin ən şərəfli səhifələrindən biridir. Azərbaycanın öz müstəqilliyini bərpa etməsi milyonlarla soydaşımızın iştirak etdiyi Milli Azadlıq Hərəkatının böyük qələbəsi idi. Yalnız Azərbaycan Xalq Hərəkatına qərəzlə və qısqanclıqla yanaşan siyasi diletantlar düşünə bilər ki, dünyanın iki supergücündən biri olan xalqlar həbsxanası – Sovet İttifaqı öz-özünə dağıldı. Sovet imperiyasını xalqların azadlıq və demokratiya uğrunda kütləvi mübarizəsi çökdürüb, iflas etdirdi. Xalqımız bu mübarizədə ən öndə olan xalqlardan oldu. Məhz bu şərəfli mübarizəsinə görə xalqımız 1989-cu ildə dünyada ilin xalqı elan edilmişdi.
Dövlət müstəqilliyi uğrunda mübarizə aparan xalqların Vilnüsdə, Tiflisdə, xüsusilə də Bakıda 20 yanvarda nümayiş etdirdiyi dirəniş bir daha göstərdi ki, Sovet imperiyası öz mövcudluğunu davam etdirə bilməyəcək. Təkcə onu xatırlamaq kifayətdir ki, 20 yanvar 1990-cı il dirənişindən dövlət müstəqilliyimizin bərpasına qədər Azərbaycanda Sovet hakimiyyəti tətbiq edilmiş fövqaladə vəziyyətin və silahın gücünə təmin edilib. Nəhayət, Sovet İttifaqı rəhbərliyində də bir çoxları anladı ki, belə davam etmək mümkün deyil.
Dövlət müstəqilliyimizin bərpası xalqımızın uzun illər davam etmiş şərəfli mübarizəsinin nəticəsidir. Xalqımız müstəqillik uğrunda mübarizədə çox qurbanlar verib, böyük fədakarlıqlar edib. Bu bayram günündə başda 20 Yanvar şəhidləri olmaqla əziz şəhidlərimizi, Azərbaycan Milli Azadlıq Hərəkatı və Azərbaycan Xalq Cəbhəsinin lideri Əbülfəz Elçibəy başda olmaqla haqq dünyasına qovuşmuş hərəkat veteranlarının xatirəsini hörmətlə anırıq, onlara Allahdan rəhmət diləyirik.
Azərbaycanın dövlət müstəqilliyinin bərpası bayramı münasibətilə hamınızı ürəkdən təbrik edirəm. Əminəm ki, xalqımız bir gün mütləq cümhuriyyət dəyər və prinsiplərini də bərpa edəcək. Müstəqillik və demokratiya xalqımızın haqqıdır. Allah Azərbaycanı qorusun! Dövlət müstəqilliyimiz əbədi olsun!