Hüquq müdafiəçisi Anar Məmmədli
Vaxtaşırı məişət zorakılığı zəminində baş verən olaylara dair vəkil Zibeyda Sadıqovanın yaydığı məlumatları oxuyuram. Çox dəhşətli statistikadır. Yanvardan bəri onun paylaşdığı xəbərlərdə döyülən, öldürülən, ya da bıçaqlanan qadınların sayı onlarladır. Hər yaş qrupundan qadınlar var. Acınacaqlı mənzərədir.
Şübhə etmirəm ki, anasını döyən oğullar, arvadını bıçaqlayan ərlər, qayınanasını öldürməyə çalışan kürəkənlər və ya qısaqançılıq edən sevgililər polisə aparılanda bunları namus-qeyrətlə izah edirlər. Bu cür tiplərin əməllərinə dair mediada xəbərləri oxuyanda illlər öncə həbsxanada həyat yoldaşını, bacısı, sevgilisi və ya anasını öldürüb dustağa çevrilən kişilərin danışdığı “namus cinayətləri” yadıma düşür.
“Namus” cinayətləri üzrə tutulduğunu deyən dustaqlarla ünsiyyətim çox az olub. Bu tip dustaqlarla ilk ünsiyyətdə ya psixi pozğunluğu ortaya çıxır, ya da onların dünyagörüşü üçün nəisə izah etmək müşgülə çevrilir. Amma bir istisna vardı ki, həmin istisnanı yaxın dostumun xahişi ilə bölüşürəm. Bugün B. adlı dustaqdan bəhs edəcəm.
Onunla “zon”a girəndən cəmi 3 gün sonra isti ünsiyyət yaranmışdı. Bu az sonra aramızdakı ünsiyyət qarşılıqlı hörmətə çevrildi.
Kürdəxanıdan həbsxanaya köçürüləndən sonrakı 4 ay ərzində mənə barakların birində münasib və daimi yer vermirdilər. Həm uyğun yer az idi, həm də yaxşı yerlər pullu idi. Nə pul istəyə bilirdilər, nə də təklif etdikləri yerlər münasib idi. Bu süründürməçilik vaxtı onunla 3 ay eyni barakda qaldım. Bu müddətdə nəzarətçilərlə mübahisələrim də yaranmışdı. Hərdən yaxınlaşıb üzləşdiyim haqsızlığa narazılığını bildirir, mənəvi dəstək verir, nədəsə köməyini təklif edirdi.
Mərkəzi Aran bölgəsindən idi. Həbsxanda çox hörmət bəslənən 10-15 dustaqdan biri idi. Bir çox mübahisə və qarşıdurmalarda tərəflər onun ədalətli fikirlərini dinləyər və qulaq asardılar. Çox qüvvətli və fit bədəni vardı. Həbsdən öncə usta kimi çalışmışdı. 70-ci illərin kino qəhrəmanlarına bənzər bığları, təmiz geyimi və stili vardı. İncə yumoru və ötkəm danışığı ona etimad yaradırdı.
Söz vaxtını çəkər, yay ayları idi. Barakın arxasında B. və iki digər tanış dustaq nərd oynarkən məni görüb çaya dəvət etdilər. Onlara qoşulub söhbətləşdik. Nərd oynayanlardan biri hansısa yeni dustaqdan söhbət salıb, törətdiyi ölüm işindən bəhs etdi. O biri də qayıtdı ki, belə şeyin üstündə adamı öldürməzlər. Gülüb soruşdum ki, bəs nəyin üstündə adam öldürərlər? Sualıma peşman oldum, elə həvəslə mümkün qətl cinayətlərini sadalamağa başladı ki, mübahisə etməli oldum. Mən elə hey deyirdim ki, özünmüdafiə xaric heç bir halda insan öldürmək olmaz. Uzun mübahisə getdi. Bizi dinləyən B. də yavaşca qayıtdı ki, namus üstündə ölümə niyə pis baxıram? Onun cinayət tarixçəsini bilmədən qəti şəkildə dedim ki, çox pis baxıram, bu mənim əqidəmə ziddir.
B üçün əqidə söhbətim tanış idi. Eyni barakda qalanda gecə siqaret çəkənlərlə, kriminal qaydaları və şəriətçiliyi təbliğ edənlərlə, dustaqlardan “hörmət” uman nəzarətçilərlə mübahisə etmiş, axırda da qayıtmışdım ki, bunlar mənim siyasi əqidəmə ziddir. Və əqidəmin də mahiyyətini izah etməli olurdum. B üçün bu əqidə mövzusu tanış idi.
Üstündən bir həftə keçməmiş rastlaşdıq və yenə çaya dəvət elədi. Oturan kimi qeyd etdi ki, bir şey soruşacaq. Bu dəfə ikimiz idik. Girişə başlayanda niyyətini anlayıb, dedim ki, sənin cinayət tarixçənin namusla bağlı olduğunu o gün hiss etdim, amma nə sən mənə, nə də mən sənə nəyisə sübut etməyə borclu deyilik. Törətdiyin əmələ görə cəza çəkirsən, mənim mövqeyim sənin üçün əsas olmaya bilər. Amma rəyimə inandığını, törətdiyi əmələ münasibət bildirməyimi xahiş etdi.
B bacısının boğazını bıçaqla kəsərək öldürüb ağır hökm almışdı. Məhkəmədə nə rüşvət vermişdi, nə də tapşırılmışdı. Amma bu olayı təfsilatı ilə bilən yoxdu.
Kiçik bacısı rayonda tanış bir ailənin övladı ilə evlənir. İlk uşağı doğulandan sonra yoldaşı Rusiyaya gedir. Az sonra bacısı da ərinin yanına gedir. İki ildən artıq orda qalıb qayıdanda qucağında ikinci uşağı olur. Gələn kimi anasına ərindən ayrılmaq istədiyini deyir. Ailəsi razılaşmır. Bir neçə dəfə anası evinə gəlir, günlərlə qalır və sonra geri göndərirlər. Bildiyimiz ailə münaqişəsi yaşanır.
B isə ailənin ən böyüyü kimi erkən evlənib və anasıgildən ayrı yaşayıb. Hərdən anasıgilə gəlib baş çəkirmiş. Dediyinə görə aralarındakı söz-söhbətin təfsilatını bilməyib. Bunu heç öyrənməyə çalışmayıb. Amma bir gün Rusiyadan bacısının yoldaşı ona zəng edib deyir ki, arvadı, yəni onun bacısı ərinə xəyanət edir. Bacısını çağırıb söhbətləşir, aydınlaşdırmağa çalışır. Qız qardaşına illərdir ayrılmaq istədiyini, əri ilə danışmadığını deyir, bunu böhtan adlandırır.
Bacısına anasigildə qalmağa icazə verir, onun qayınatasına isə onların boşanacağını deyir. Bundan sonra bacısı barədə şaiyələr yayılmağa başlayır. Guya ər evindən xəyanətinə görə qovulub. Çox keçmir Rusiyadakı ər də qayıdır, onunla görüşüb deyir ki, bu ləkəni ya o, ya da ər təmizləməlidir – bacısı filankəslə görüşür…
B bacısının telefonunu yoxlayanda onun həmin filankəslə yazışdığını, danışdığını görür. Və günlərin birində evdə heç kim olmayanda bacısını öldürür.
Ona izah etməyə çalışdım ki, heç kimin bir başqasını öldürməyə, onun canına qəsd etməyə haqqı yoxdur. Əgər ailə üzvünün hərəkəti – bu bacın da ola bilər, qardaşın da, valideynin də – sənin xoşuna gəlmirsə, münasibətini kəsə, ayrı yaşaya bilərsən. Amma B nəslinin şərəfindən, ailəsinin namusundan bəhs etməyə başladı. Nə isə, axırda əsəbləşib qayıtdım ki, sən kiminsə qarşısında bu əməlinə görə rəğbət qazana bilərsən, amma mənim üçün iki körpənin anasının qatilisən. Çox tutuldu, düşüncəyə getdi və söhbətimiz başa çatdı.
Üstündən 2-3 həftə keçmişdi ki, telefon köşkünün qarşısında rastlaşdıq. Növbəmizi gözləyərkən söhbətləşdik. Keçmiş söhbəti xatırladım dedim ki, deyəsən səni incitmişəm, sözlərim sənə pis təsir edib. B bir az gülümsəyərək, qayıtdı ki, sən 8 illik rahatlığımı pozdun…
Gəzişməyə başladıq. Adamlardan xeyli uzaqlaşandan sonra qayıtdı ki, indi anladım, bacımın böyük qızı son 8 ildə mənimlə danışmayıb. Anası öləndə uşağın 5 yaşı olarmış və ötən müddətdə hansısa bəhanə ilə dayısı ilə danışmayıb. Danışığında peşimançılığı hiss edirdim, amma dilinə gətirmirdi. “Gərək Moskvadan qayıdan kimi onu eşidib ərindən ayırardım, özünə də öyüt-nəsihət verərdim, yəqin ki, məni eşidərdi, hər adama aldanmazdı”.
Bir saat qədər gəzişib bir yer tapıb oturduq. Artıq üzü tutulmuşdu, hərdən öz-özünə danışırdı. Gözünü harasa zilləyib, söyləndirdi.
“O qız mənim əlimdə böyüyüb, o qədər onun saçını daramışam, məktəbə aparmışam, boynumda gəzdirmişəm”…
“Atamız öləndə o bizim qədər hiss etmədi ölümünü, ona ata əvəzi oldum, axırda da belə” “Bacımın uşaqları məni necə qarşılayacaq, onları yetim qoydum, üzlərinə necə baxacam”…