Тил тўғрисида гапирганнинг тилини суғуришмоқчи

Давлат тили ҳақидаги қонун ҳужжатларига риоя этмаган мансабдор шахсларга жарима солишни кўзда тутган қонун лойиҳаси Ўзбекистонда яшовчи рус тилли аҳолининг камситилиши сифатида талқин қилинмоқда. 

Россиянинг Regnum нашри «Ўзбекистонда давлат органларида рус тилидан фойдаланганлик учун жарима белгиланади», деб ёзди.

Ўзбекистонда қайд этилган рус тилидаги “Вести.уз” cайти эса «Ўзбекистонда Пушкин тили учун жарима қўллашмоқчи», деган мақолани чоп қилди.

Рус тилидаги сайтларда чоп этилган шу ҳилдаги мақолалар атай ёки тушунмасликдан янги қонун лойиҳаси мазмунини бузиб кўрсатмоқда.

Адлия вазирлиги сайтида муҳокама учун чоп этилган «Ўзбекистон Республикасининг Маъмурий жавобгарлик тўғрисидаги кодексининг 42-моддасига қўшимча киритиш тўғрисида»ги қонун лойиҳаси мутлақо давлат муассасалари ва ташкилотларига тааллуқлидир.

Яъни агар давлат ташкилотининг мансабдори ўзбек тилида иш юрита олмаса, унга жарима қўлланиши мумкинлиги таъкидланган.

Давлат амалдоридан давлат тилини билишни талаб қилиш дунёдаги барча мамлакатлар учун табиий ҳолатдир ва агар янги қонун лойиҳаси қабул қилинса, жорий қилинадиган жарималар Ўзбекистонда давлат амалдорларининг ўзбек тилини ўрганишларини тезлаштиради.

Eltuz.com