Косонлик ўқитувчилар мажбурий югуртирилмоқда

Қашқадарёлик ўқитувчилар вилоят ҳокими топшириғи билан ҳар куни мажбурий марафонда қатнашаётганидан шикоят қилишмоқда. Косон туман мактабларидан бирида ўқитувчилик қилувчи аёл, аллақачон мактабларда таътил бошланганига қарамай, уларни юргуришга мажбурлашаётгани ҳақида Элтузга шикоят қилди.

“Косон туман Халқ Таълими бўлими бир ярим ойдан бери мажбурий марафон ўтказаяпти. 25 май сўнгги қўнғироқ бўлди. Биз энди қутулдик десак, ҳали ҳам марафон тўхтамаяпти” дея ёзди косонлик ўқитувчи аёл телеграм мессенжери орқали Элтузга.

Биринчи июнь куни болаларини истироҳат боғига олиб бориб, салқин жойларда оилавий дам олишни режалагани. Бироқ, эрталабдан мактаб директори, жисмоний тарбия ўқитувчилари қўнғироқ қилиб, мажбурий чақиртириб олдиришганини айтади.

“Агар спорт тадбирида қатнашмайдиган бўлсам ишдан бўшаш ҳақида ариза ёзишим керак экан”, дейди ўқитувчи аёл.

Унинг тағин Элтузга айтишича, марафон учун ўқитувчилар ва болалар юз минг сўмдан оқ кепка ва футболка сотиб олишга мажбур. Ота-оналар таътилдан кейин бу тадбирларга болаларини юбормай қўйишгани боис, энди фақат ўқитувчилар оқ футболка кийиб чиқишмоқда.

Ўқитувчининг сўзларига кўра, Косон туманида дастлаб апрель ойининг иккинчи ярмида бошланган соғломлаштириш марафони якшанба кунидан ташқари ҳар куни давом этмоқда, ўқитувчилар ҳар ҳар ҳил масофага югуртирилмоқда.

Элтуз муаммони ўрганиш учун Қашқадарё вилоят Косон тумани Халқ таълими бўлимига қўнғироқ қилди.

Косон ХТБ бўлими ходимасининг Элтузга билдиришича, ўқитувчиларнинг муаммоси биргина спорт марафонида вақт йўқотиб, ҳар куни югуришдангина иборат эмас.

“Уларни масалан, обод маҳалла дастурига кирган маҳаллаларни ободонлаштириш ишларига ҳам муттасил мажбурий жалб қилишади. Лекин бу йил, коронавирус пандемияси шарофати билан тумандаги иккита маҳаллага хашарга чиқиш тадбири бекор қилинди” деди у.

Ҳар кунги спорт марафонига изох бераркан, ХТБ туман бўлими ходимаси, бу тадбирнинг Қашқадарё вилоят ҳокими Зойир Мирзаев буйруғига кўра, президент Мирзиёев ташаббуси билан ўтган йили бошланган “5 минг қадам” юриш дастури асосида ўтказилаётганини билдирди.

Eltuz.com