Хазорасплик фермерларнинг сабр косаси тўлди

Хоразм вилояти Хазорасп тумани фермерлари айни пахта терим мавсумида лўккиллаб ҳокимлик мажлисларига қатнаб юрибди.

Ҳар бир фермерга ҳоким ёрдамчиси ёки давлат бюджетидан таъминланадиган идора бошлиқлари вакил (қоровул) қилиб тайинланган. Бир ишчига ўнта бошлиқ нимага керак?

Шунингдек, фермерлар охирги йиллардаги ягона даромад манбаи бўлган шолини давлатга шартномасиз ноқонуний топширишга мажбурланмоқда. Бу ҳар йили такрорланувчи «юлғуч анъана». Бу жараёнда ҳам ҳоким ёрдамчилари бош-қош.

«Минбарларда бизга айтилган гапларнинг бари қуруқ сафсата. Амалда фермерлар ноқонуний ишлар қилишга мажбурланяпти. Фермерни ҳеч ким ҳимоя қилмайди. Масалан, ўтган йили бир тумандан иккинчи туманга қонуний олиб борилаётган пахта тўхтатилиб, фермерни ИИБга олиб боришган, тушунтириш хати ёздиришган ва қилмаган ишларини бўйнига қўйишга уринишган. Хатто тракторчи ва фермерни 15 суткага қамоққа олишмоқчи бўлишган. Атайин босим қилишади. Мақсад – бизни йўқотиб, ерларни каттароқ кластерга топшириш,» – дейди қонунсизликдан безган фермерлар.

Бундай мантиқсиз қарорлар ва кучли босим бутун Республика фермерларини эзиб юборди. Фермерни азоблаш механизмининг муҳандиси ким?