Президентига қарши чиқган блогер қамалди

Президентига қарши чиқган блогер Одилжон Шокиров 6 йилга қамалди. Суд ҳужжатларига кўра, Андижон вилоятида яшовчи 28 ёшли Шокиров 2024 йил охирида “@xalqparvar12_12” номли TikTok аккаунтини очиб, унда президент Шавкат Мирзиёев истеъфосини талаб қилувчи видеолар, матнлар ва постлар жойлаштирган. Шунингдек, у фуқароларни 2025 йил 17 февраль куни Мустақиллик майдонида митинг ўтказишга даъват қилган.Шокировга нисбатан Ўзбекистон Жиноят кодексининг 158-моддаси (Президентни ҳақоратлаш), 159-моддаси (Конституциявий тузумга тажовуз) ва 244-моддаси (Оммавий тартибсизликка даъват) бўйича жиноят иши қўзғатилган. Суд унга тайинланган жазоларни умумийлаштириб, 6 йиллик қамоқ жазосини белгилади.Суд ҳукмида қайд этилишича, Шокиров “Komil_inson_bol” ва “KOZIMU1” каби профил фойдаланувчилари билан тил бириктирган ҳолда, мамлакатдаги ижтимоий-иқтисодий вазиятни танқид қилган ва норозилик руҳидаги контентлар тарқатган.Блогер ушбу ҳаракатларни Қозоғистондаги меҳнат муҳожирлиги пайтида амалга оширган ва ўша ердан қайтиб келгач, Ўзбекистон ҳуқуқ-тартибот органлари томонидан қўлга олинган. Ҳуқуқни муҳофаза қилиш органлари унинг аккаунтлари орқали тарқатилган материалларни видеодалил сифатида жиноят ишига илова қилганлар.Суд, шунингдек, Шокировга тегишли бўлган барча ижтимоий тармоқ аккаунтларини блоклаш ҳамда у фойдаланган RedMi A03 телефонини йўқ қилиш ҳақида қарор чиқарди.Шокиров судда қилмишидан афсусдалигини билдириб, кечирим сўраган. У аввал судланмаган, оилали ва бир нафар фарзанди бор.