Учкўприкда тўрт йигит 14 яшар қизни жинсий зўрлади

2026 йил 9 январь куни Фарғона вилоятининг Учкўприк туманига қарашли Кенагас қишлоғида жамоатчиликни ларзага солган оғир жиноят содир этилди. Дастлабки маълумотларга кўра, Буйрак қишлоғида яшовчи ёш қиз бир гуруҳ йигитлар томонидан жинсий зўрланган.

Маълум қилинишича, қизни тўрт йигит навбат билан зўрлашган. Улар қизни олдиндан ижарага олинган, Кенагас қишлоғида жойлашган бильярдхонада жинсий зўравонлик содир этганлар. 

Бу бильярдхона Қўқон–Фарғона йўли бўйида, МФЙ биносидан атиги 200 метр узоқликда жойлашган.

Йигитларнинг уч нафари Кенагас қишлоғидан, яна бири эса Боғдод туманининг Қўштегирмон қишлоғидан экани аниқланган.

Тергов маълумотларига кўра, йигитлардан бири Lacetti русумли автомашинада қизни бильярдхонага олиб келган. Ушбу жой ҳақида маҳаллада аввалдан тарбиясида муаммоси бор ёшлар тез-тез тўпланиши тўғрисида гап-сўзлар юради.

Қизни таниганлар унинг руҳий соғлигида муайян муаммолар мавжудлигини таъкидламоқда. Бу ҳолат жиноятнинг ижтимоий ва маънавий оғирлигини янада оширади.

Воқеадан сўнг қизнинг онаси туман Ички ишлар бўлимига мурожаат қилган. Ҳуқуқни муҳофаза қилувчи органлар томонидан дастлаб жами етти нафар шахс ушланган. Улардан тўрт нафарига нисбатан эҳтиёт чора сифатида қамоққа олиш чораси қўлланилган, қолган уч нафар шахс эса қўйиб юборилган.

Қўлга олинган шахслар 2002 йилда туғилган бўлиб, улардан бири оилали ва икки нафар фарзандга эга экани маълум қилинмоқда. Айни пайтда мазкур жиноят иши юзасидан тергов ҳаракатлари олиб борилмоқда.