Таиландда рус кемаси ҳалокатга учради

11 январь куни Таиланднинг Андаман денгизида, аниқроғи Пхи-Пхи ороллари яқинида туристларни олиб кетаётган Россия кемаси ҳалокатга учради. Сайёҳлик кемаси балиқчилар кемаси билан тўқнашиб кетган ва оқибатда рус кемаси сувга ғарқ бўлган.

Россиянинг Пхукетдаги бош консуллиги ва маҳаллий ОАВ хабарларига кўра кема бортида жами 52 нафар йўловчи ва 3 нафар экипаж аъзоси бўлган. Йўловчилар орасида Россияликлардан ташқари, Қозоғистон, Қирғизистон ва Ўзбекистон фуқаролари ҳам бўлган. 

Дастлабки маълумотларга кўра, кемада бўлган жумладан 4 нафар ўзбекистонлик тирик қолган ва уларга керакли тиббий ёрдам кўрсатилган.

Ҳалокат оқибатида қурбонлар борлиги ва турли даражадаги жароҳат олган 20 дан ортиқ киши шифохонага ётқизилган. Уларга Россиянинг суғурта ширкатлари товон пули ажратиши кераклиги айтилмоқда.

Ҳозирда Таиланд расмийлари воқеа юзасидан тергов ишларини олиб бормоқда. Тўқнашувнинг асосий сабаблари сифатида рус кемасининг техник носоз бўлгани билдирилмоқда.