ДХХ ҳибсга олган журналистнинг Муҳаммад Солиҳдан олган интервьюси очиқланди

ДХХ тергов бошқармаси томонидан ҳибсга олинган Саид-Абдулазиз Юсуповнинг Ўзбекистон “Эрк” демократик партияси лидери Муҳаммад Солиҳдан олган интервьюси 13 май куни Ютуб каналида пайдо бўлди.

Бу Юсуповнинг қамалишидан бир неча ой илгари Туркияда тасвирга олган, бироқ қамалганидан кейингина яқинлари томонидан очиқланган иккинчи видеосидир.

Дастлабки видео бир кун олдин – 12 май куни чоп қилинган, Юсуповнинг президент Мирзиёевга видеомурожаати эди.

Видеомурожаатида журналист “агар бу кўрсатув интернет тармоғига қўйилган бўлса, сиз кўраётган онларда мен ё ҳибсда, ё Ватандан ташқарида, ёки, Худо кўрсатмасин, бахтсиз ҳодиса туфайли вафот этган бўламан”, дейди.

Ҳар иккала видео – Муҳаммад Солиҳдан олинган интервью ҳамда Юсуповнинг президентга видеомурожаати, “Элтуз”нинг ўрганишича, 2018 йилнинг 25 сентябрида Туркияда суратга олинган. Юсуповнинг яқинлари томонидан тармоққа қўйилган.

10 май куни ДХХ журналистнинг уйида тинтув ўтказган эди. Юсупов айни дамда ДХХнинг Тошкентдаги “Гвардейский” деб ном чиқарган ҳибсхонасида сақланаётгани айтилмоқда.

Видео: https://youtu.be/F1B4uHASRU4

Eltuz.com