Андижон туғруқхонаси фарроши ИИБ ходимлари уни уришганини айтмоқда

Андижон шаҳри 2-туғруқхонаси фарроши 33 яшар Одинахон Эргашева 9 июнь куни ички ишлар ходимлари уни телефон ўғирлаганликда гумон қилиб, Андижон шаҳри 4-ИИБга олиб бориб калтаклашгани, мажбурлаб ароқ ичиришганини иддао қилди.

“Битта касалнинг телефони йўқолиб қолди. Менинг сменамда йўқолган. Ўша куни топилибди ҳам. Мени уриб, қийнашганидан кейин…”.

Эргашева ўз интервьюсида 6 июнь куни уни Андижон шаҳри 4-ИИБ қидирув бўлими хонасига олиб киришиб, қидирув бўлими бошлиқлари назорати остида калтаклашганини билдиради.

“Кўкартирмайдиган қилиб ур. Кўкартирма буни. Ичини тўк”, деб роса ўргатиб турди иккитаси. Қолган уч киши эса мени урди”, деди у.

Эргашева, шунингдек, ИИБ ходимлари унинг оғзига мажбурлаб ароқ қуйишганини айтади:

“Бўйнимни бундай қилишиб, аччиқ нарса қуйишди. “Нима бу?” дедим, “ароқ” дейишди, бурнимни бекитиб туриб, ичасан, дейишди”.

Андижон вилояти ИИБ 9 июнь куни воқеа юзасидан тарқатган хабарида чиндан ҳам йўқолган телефоннинг бемор ётган хонадан топилганини эътироф этди.

Бироқ ИИБ Одина Эргашевани ички ишлар ходимларига ташланиб, безорилик қилганликда айбламоқда.

Одина Эргашева калтаклардан кейин тез-тез ҳушидан кетаётганини, шифохонадаги ҳамкасблари эса уни тиббий кўрикдан ўтказишга ҳам рози бўлишмаётганидан шикоят қилмоқда.

“Элтуз” 12 июнь куни кун давомида Эргашева билан боғланишга уринди, бироқ унинг телефони алоқадан узилганича қолди.

Eltuz.com