Маҳмуд Ражаб ва унинг тарафдорлари Тошкентга қараб юриш бошлашди

Ўзбекистон “Эрк” демократик партияси аъзоси, шоир ва журналист Маҳмуд Ражаб адолат истаб 22 сентябрь куни Хоразмдан Тошкентга қараб йўлга чиқди.

Сумкасидан Муҳаммад Солиҳ китоблари чиққани учун терговга тортилганидан норози 56 яшар Маҳмуд Ражаб, унинг қариндошлари ва тарафдорлари Тошкентга, ички ишлар вазири Пўлат Бобожонов билан учрашувга яёв юриб боришни режалаганини айтишмоқда.

Бундан аввал, 20 сентябрь куни, “Элтуз” олган хабарларга кўра, Маҳмуд Ражабни олиб кетиш учун милиция капитани Бекчанов бошчилигида Хоразм вилояти ИИБ ходимлари келишган. Бироқ шоирнинг маҳалладошлари уни милиция олиб кетишига қаршилик кўрсатишган.

“Менинг халқ олдида ҳам, виждоним олдида ҳам, ҳукумат олдида ҳам, қонун олдида ҳам ҳеч қандай айбим йўқ.

Ўзимни ўзим инсонийлик принципларидан келиб чиқиб ҳимоя қиламан. Чунки бу мени 5 йил қамашга қаратилган, мени кўра олмайдиган бировларнинг иши”, деди маҳалладошлари ва видеокамера олдида Маҳмуд Ражаб.

Эслатиб ўтамиз, Маҳмуд Ражаб шоир Муҳаммад Солиҳ асарларини Ўзбекистонга олиб кирганликда асоссиз айбланиб терговга тортилган. “Элтуз” нашри шоир Маҳмуд Ражаб тақдири билан боғлиқ воқеаларни кузатишда давом этади.

Воқеа жойидан мустақил журналист Шабнам Оллошукурова тўғридан тўғри видеорепортажлар жўнатмоқда. Воқеалар ривожини “Элтуз” каналида ҳам кузатишингиз мумкин.

Eltuz.com