Москвада элчихона вакили ҳарбийга чорлов қоғози тарқатди

Москвада ўзини элчихона вакили дея таништирган шахс ўзбек мигрантларга ҳарбий хизматга чорлов қоғози тарқатаётгани ҳақида хабар Элтузга етиб келди.

Суратдаги ҳарбий хизматга чорлов қоғози Москвадаги Федерал Миграция Хизмати биносига борган ўзбекистонлик меҳнат муҳожирларига тарқатилмоқда.

Суратни юборган Элтуз обуначисининг айтишича, чақирув қоғозларини ўзини “Ўзбекистон элчихонаси вакили” дея таништирган шахс муҳожирлар қўлига мажбурлаб тутқазмоқда экан.

“Имзо қўймасангиз, патентингизни бермаймиз деб қўрқитишмоқда. Энг алам қиладигани, бу ишга Ўзбекистон элчихонасидан келган маъсул ходим бош бўлиб турганидир. Бу иш учун элчихона ходимига Ўзбекистон раҳбарияти чора кўради деган умиддаман,” деб ёзади Элтуз обуначиси.

Бироқ Элтуз ушбу хабарни ўз манбалари орқали тасдиқлай олмади.

Биз Ўзбекистон элчихонаси вакилларининг ФМС (Федерал Миграция Хизмати) биносига бориб, муҳожирларни Россия қуролли кучлари сафига чорлашига ишонмаймиз.

Ўзини элчихона вакили деб таништирган шахс меҳнат муҳожирлари ишончига кириб, уларни алдов йўли билан урушга ёллашга уринаётган бўлиши мумкин деган фикрдамиз.

Шу билан бирга, Ўзбекистон Ташқи Ишлар Вазирлиги ушбу хавотирли хабарни ўрганиб чиқади деган умиддамиз.

Элтуз ўз кўрсатувларини давом эттиради. Видеоларимизга лайк босишни, каналимизга обуна бўлишни унутманг.