Ukrayna Prezidenti Volodimir Zelenski xalqa müraciət edib.
Gununsesi.info xəbər verir ki, Zelenski 24 fevralda Ukraynaya xəyanət etmədiklərini, bundan sonra xəyanət etməyəcəklərini bildirib.
“Mən indi bütün ukraynalılara müraciət edirəm – xalqımız, vətəndaşlarımız, siyasətçilərimiz, hər kəs özünü ələ almalı, ayılmalı, bölücülüyü, çirkin çəkişmələri və siyasi oyunları dayandırmalıdır. Döyüşən ölkənin parlamenti vahid şəkildə işləməlidir. Döyüşən ölkənin hökuməti səmərəli fəaliyyət göstərməlidir. Və biz hamımız, birlikdə, bu gün Ukraynanın düşməninin kim olduğunu unutmamalı və qarışdırmamalıyıq”.
O qeyd edib ki, Ukrayna hazırda çox çətin seçim qarşısında qala bilər:
“Ya ləyaqətin itirilməsi, ya da əsas tərəfdaşın itirilməsi riski. Ya çətin 28 maddə, ya da son dərəcə ağır – ən ağır qış və əlavə risklər qarşısında qala bilərik. Azadlıq, ləyaqət və ədalət olmadan yaşamaq… və artıq iki dəfə hücum etmiş tərəfə inanmaq. Bizdən cavab gözləniləcək.
Həmin cavabı artıq inauqurasiyası zamanı vermişik. Bütün fəaliyyətimlə Ukraynanın suverenliyini və müstəqilliyini qorumağa, vətəndaşların hüquq və azadlıqlarını müdafiə etməyə, Ukraynanın Konstitusiyasına və qanunlarına əməl etməyə and içmişəm”.
Zelenskinin sözlərinə görə, Ukrayna 24 fevraldakı kimi yaşamamalıdır.
“ O zaman elə bir hiss vardı ki, biz təkik, Putinin ordusuna qarşı divar kimi dayanan qəhrəman insanlarımızdan başqa heç kim Rusiyanı dayandıra bilmirdi. Əlbəttə, bizim üçün çox xoş idi ki, dünya belə deyirdi. Ukraynalılar möhtəşəmdirlər. İlahi, onlar necə möhtəşəmdirlər! Necə döyüşürlər, necə mübarizə aparırlar, onlar əsl titanlardır. Bu tamamilə doğrudur. Lakin həm Avropa, həm də bütün dünya başqa bir həqiqəti də anlamalıdır: ukraynalılar hər şeydən əvvəl insandır. Biz artıq demək olar ki, dörd ildir ki, dünyanın ən böyük ordularından birinə qarşı tammiqyaslı işğalı saxlayırıq. Bir neçə min kilometrlik cəbhə xəttini qoruyuruq. Xalqımız hər gecə atəşlərdən, raket hücumlarından, ballistik zərbələrdən, ‘Şahed’ dronlarının hücumlarından əziyyət çəkir. İnsanlarımız hər gün sevdiklərindən birini itirir. Və xalqımız çox, çox istəyir ki, müharibə – məhz bu müharibə bitsin. Bəli, ukraynalılar polad kimidirlər, amma ən möhkəm metal belə bir gün dözümsüz ola bilər”.
Ölkə başçısı xalqın dəstəyini hiss etdikdə, Ukraynanın taleyi üçün lazım olan qərarları əldə etməyin daha asan olacağını vurğulayıb.
“Gələcək görüşlər, müzakirələr və tərəfdaşlarla danışıqların bütün formatlarında mənə ləyaqətli sülhü əldə etmək və onları buna inandırmaq daha asan olacaq — çünki yüz faiz əminəm ki, xalq Ukraynanın arxasındadır. Ukrayna üçün həyatını qurban vermiş bütün qəhrəmanlarımız, indi göylərdədir və oradan görməyə layiqdirlər ki, onların övladları və nəvələri ləyaqətli bir dünyada yaşayacaqlar. Və bu dünya olacaq — ləyaqətli, təsirli və uzunmüddətli.
Əsas tərəfdaşımızla konstruktiv şəkildə həll yolları axtarılacaq. Mən arqumentlər gətirəcəyəm, inandırmağa çalışacağam, alternativlər təklif edəcəyəm. Amma biz düşmənə elə bir bəhanə verməyəcəyik ki, guya Ukrayna sülh istəmir, prosesi pozur və diplomatiyaya hazır deyil. Belə bir şey olmayacaq”.
