ဂျပန်နိုင်ငံ တိုကျိုမြို့ရှိ ကုလသမဂ္ဂ (UN) ရုံးရှေ့တွင် ယနေ့ (သြဂုတ် ၁၁) ဂျပန်ရောက် မြန်မာများ ဦးဆောင်၍ ကရင်အာဇာနည်နေ့ အခမ်းအနားနှင့် အကြမ်းဖက် စစ်အာဏာရှင် ဆန့်ကျင်ရေး ဆန္ဒပြပွဲ ကျင်းပပြုလုပ်ခဲ့ကြသည်။
ပြည်ပရောက် မြန်မာများက ကရင်လူမျိုးများ၏ တန်းတူညီတူ အခွင့်အရေးနှင့် ကိုယ်ပိုင်ပြဌာန်းခွင့်အတွက် တိုက်ပွဲဝင်ရင်း အသက်ပေးလှူခဲ့ကြသော ကရင်အာဇာနည်ခေါင်းဆောင် စောဘဦးကြီးနှင့် ခေတ်အဆက်ဆက် အာဏာရှင်စစ်တပ်အား တော်လှန်တိုက်ပွဲဝင်ရင်း အသက်ပေးစွန့်လှူခဲ့ကြသော ကရင့်အာဇာနည်များအား ဂုဏ်ပြုခြင်း အခမ်းအနား ပြုလုပ်ခဲ့သည်။
ထို့နောက် အကြမ်းဖက် စစ်ကောင်စီမှ ၂၀၂၃ အတွင်း ကျင်းပရန်ကြိုးပမ်းနေသည့် ရွေးကောက်ပွဲအား ကန့်ကွက်ခြင်း၊ စစ်ကောင်စီက ကိုဂျင်မီ၊ ကိုဖြိုးဇေယျသော်၊ ကိုလှမျိုးအောင်နှင့် ကိုအောင်သူရဇော်တို့ လေးဦးအား သေဒဏ်ပေး ကွပ်မျက်ခဲ့ခြင်းအပေါ် ရှူတ်ချခြင်းနှင့် မတရားဖမ်းဆီးခံထားကြရသော နိုင်ငံ့ခေါင်းဆောင်များနှင့် နိုင်ငံရေးအကျဉ်းသားများအား ချွင်းချက်မရှိ အမြန်ဆုံး ပြန်လွှတ်ပေးရန် တောင်းဆိုခဲ့သည်။
ထို့အပြင် အကြမ်းဖက် စစ်ခေါင်းဆောင် မင်းအောင်လှိုင်နှင့် စစ်အုပ်စုအား နိုင်ငံတကာ UN/ICJ/ICC တို့မှ အမြန်ဆုံး အရေးယူဆောင်ရွက်ပေးရန်လည်း တောင်းဆိုဆန္ဒပြခဲ့သည်။
