အင်းစိန်ထောင်မှာဖမ်းဆီးထားတဲ့ နိုင်ငံရေးအကျဉ်းသား ၁၃၀ နီးပါးကို မိသားစုဝင်တွေ ထံအသိမပေးဘဲ သာယာဝတီထောင်ဆီ စစ်ကောင်စီက သြဂုတ်လ၇ ရက်က ပြောင်းရွှေ့လိုက်တယ်လို့ အကျဉ်းထောင်အသိုင်းအဝိုင်းနဲ့နီးစပ်သူအချို့ထံကသိရပါတယ်။
ဒီလိုထောင်ပြောင်းလိုက်တာကို သက်ဆိုင်ရာမိသားစုဝင်တွေဆီ အကြောင်းကြားတာမျိုးမလုပ်ဘဲ စစ်ကောင်စီက တိတ်တဆိတ် ပြုလုပ်ခဲ့တာပါ။
သာယာဝတီထောင်ကိုပြောင်းရွှေ့ခံရသူတွေထဲ ကျောင်းသားတွေလည်းပါတယ်လို့သိရပါတယ်။
ရန်ကုန်အရှေ့ပိုင်းတက္ကသိုလ် ကျောင်းသားများသမဂ္ဂ ဥက္ကဋ္ဌဟောင်း ကိုအောင်ခန့်ကျော်လည်း သာယာဝတီထောင်ကို သြဂုတ်လ ၇ ရက်က ပြောင်းရွှေ့ခံလိုက်ရတယ်လို့ ရန်ကုန်အရှေ့ပိုင်းတက္ကသိုလ် ကျောင်းသားများသမဂ္ဂက ထုတ်ပြန်ထားပါတယ်။
သက်ဆိုင်ရာမိသားစုတွေကို အကြောင်းမကြားဘဲ ရုတ်တရက် ထောင်ပြောင်းရွှေ့တာဟာ နိုင်ငံရေးအကျဉ်းသားတွေနဲ့ မိသားစုဝင်တွေရဲ့စိတ်ဓာတ်ပျက်ပြားစေဖို့ ရည်ရွယ်တဲ့ မတရားဖိနှိပ်မှုတွေထဲက လုပ်ရပ်တစ်ခုဖြစ်တယ်လို့ ရန်ကုန်အရှေ့ပိုင်းတက္ကသိုလ်ကျောင်းသားများသမဂ္ဂဆိုထားပါတယ်။
ဒါအပြင် ထောင်တွင်းလှုပ်ရှားမှုတွေကိုထိန်းချုပ်နိုင်ဖို့ကြံစည်တဲ့ လုပ်ရပ်လည်းဖြစ်တယ်လို့ သုံးသပ်ထားပါသေးတယ်။
