စစ်ကောင်စီတပ်မှ ရုန်းထွက်ပြီး ကရင်အမျိုးသားအစည်းအရုံး(KNU)ထံခိုလှုံ လာသည့် စစ်ကောင်စီ တပ်ဖွဲ့ဝင်များကို ကျန်မိသားစုဝင်များနှင့်ပြန်လည် ဆုံဆည်းနိုင်ရေး KNUက ဆောင်ရွက်ပေးနေ ကြောင်း Salween Press က ဓာတ်ပုံများနှင့်တကွ ဖော်ပြသည်။
ယခုနှစ် ဇူလိုင်လကုန်ပိုင်းက KNU ထံခိုလှုံလာသည့် စစ်ကောင်စီ၏ တပ်မ(၄၄)လက်အောက်ခံခမရ (၂၀၇) မှ ဒုတပ်ကြပ် ကျော်နိုင်စိုး၏ ကျန်ရှိသည့် မိသားစုဝင်များကို KNUက ခေါ်ယူပေး၍ဩဂုတ် ၁၂ရက်မှစ၍ မိသားစုနှင့်အတူ ဆုံဆည်းနိုင်ခဲ့ပြီဖြစ်သည်ဟု ဆိုသည်။
ဒုတပ်ကြပ်ကျော်နိုင်စိုးသည် မြ၀တီ – ဝေါ်လေ လမ်းအနီး ကော်ဘရာ စစ်ကြောင်းနှင့် တိုက်ပွဲဖြစ် နေသည့် စစ်ကောင်စီတပ်စစ်ကြောင်းမှ တပ်ဖွဲ့ဝင် ဖြစ်ပြီး ဇူလိုင် ၁၆ရက်တွင် စစ်ကောင်စီတပ်က ထွက်ပြေးလာခဲ့ခြင်းဖြစ်သည်။
၎င်းအနေဖြင့် စစ်မတိုက်လိုတော့ကြောင်း ၊ စစ်ကောင်စီခေါင်းဆောင်များသည် ၎င်းတို့ အာဏာတည်မြဲရေးအတွက် အောက်ခြေကို မငဲ့ဘဲလုပ်ဆောင်နေခြင်း ကြောင့် ရှေ့တန်းရောက် စစ်သားများက စစ်ကောင်စီခေါင်းဆောင် မင်းအောင်လှိုင်ကို မကျေနပ်ကြကြောင်း ဒုတပ်ကြပ် ကျော်နိုင်စိုး CDM ပြုလုပ်လာချိန်တွင် ပြောဆိုထားသည်။
ဒုတပ်ကြပ်ကျော်နိုင်စိုး အပါအဝင် ရှေ့တန်းရောက်စစ်သည်များ စစ်ကောင်စီ တပ်မှ ရုန်းထွက်ပြီး KNU ထံ ခိုလှုံလာမှုများစွာရှိခဲ့ပြီး KNU အနေဖြင့်လည်း လာရောက်သူများကို ကောင်းမွန်စွာ ကြိုဆိုလျက်ရှိသည်။
