အာဏာသိမ်းစစ်ကောင်စီခေါင်းဆောင်ကို ဝန်ကြီးချုပ်အဖြစ် ခေါ်ဝေါ်သုံးစွဲပြီး စစ်ကောင်စီထံ ပေးပို့တဲ့ နိုင်ငံတာကာအဖွဲ့အစည်း ၁၂ ဖွဲ့ရဲ့ ပူးတွဲပေးပို့စာကို NUG အစိုးရက ပြင်းပြင်းထန်ထန်ကန့်ကွက်လိုက်ပါတယ်။
လာမယ့်စက်တင်ဘာလထဲ နယူးယောက်မှာကျင်းပမယ့် ကုလသမဂ္ဂ ပညာရေးအသွင်ကူးပြောင်းမှုဆိုင်ရာ ညီလာခံနဲ့ပတ်သက်ပြီး စစ်ကောင်စီကို နိုင်ငံတကာအဖွဲ့အစည်း ၁၂ ဖွဲ့က ပြီးခဲ့တဲ့ ရက်ပိုင်းက ပူးတွဲစာပေးပို့ခဲ့တာပါ။
အဲဒီအဖွဲ့တွေထဲမှာ နိုင်ငံတကာ လူ့အခွင့်အရေးစောင့်ကြည့်ရေးအဖွဲ့ကြီး (HRW)၊ နိုင်ငံတကာလွတ်ငြိမ်းချမ်းသာခွင့်အဖွဲ့ကြီး (AI) ၊ Save the Children တို့လို့အဖွဲ့တွေလည်းပါဝင်နေပြီး စစ်ကောင်စီခေါင်းဆောင်ကို ဝန်ကြီးချုပ်လို့ ပူးတွဲပေးပို့စာထဲမှာ သုံးစွဲထားပါတယ်။
ဒီစာထွက်ပေါ်လာပြီးနောက် ပြင်းထန်တဲ့ဝေဖန်မှုတွေရှိလာပြီး Save the Children နဲ့ AI တို့ က HRW အနေနဲ့ သူတို့ကိုအသိပေးတာမျိုး၊ သဘောတူညီချက်ယူတာမျိုးမရှိဘဲ ပူးတွဲပေးပို့စာမှာ အဖွဲ့အစည်းအမည်ထည့်သွင်းလိုက်တာဖြစ်တယ်လို့ ပြန်ရှင်းလင်းလာပါတယ်။
HRW ဘက်ကလည်း စစ်ကောင်စီကို အသိအမှတ်မပြုဘဲ စာမှားယွင်းပေးပို့မိတာလို့ ဖြေရှင်းခဲ့ပါတယ်။
ဒါပေမယ့် HRW ရဲ့ပြန်လည်တောင်းပန်စာ ဟာ အလွန်တိုတောင်းပြီး ဝမ်းနည်းစိတ်ပျက်ဖွယ်တွေ့ရတယ်လို့NUG ပြောပါတယ်။
နိုင်ငံတကာအဖွဲ့အစည်း ၁၂ ဖွဲ့ရဲ့ ပူးတွဲပေးပို့စာဟာ မြန်မာပြည်သူတစ်ရပ်လုံးကိုစော်ကားသလို ဖြစ်နေပြီးသက်ဆိုင်ရာအဖွဲ့အစည်းတွေရဲ့ ပုံရိပ်လည်းထိခိုက်စေတယ်လို့ NUG ကဆိုပါတယ်။
NUG ဟာ မြန်မာပြည်သူတွေရဲ့ တရားဝင်အစိုးရ ဖြစ်ပြီး ကုလသမဂ္ဂကလည်း NUG အစိုးရခေါင်းဆောင်တွေကို တရားဝင်အသိအမှတ်ပြု မှုတွေလုပ်ဆောင်နေတယ်လို့ NUG ကအသိပေးထားပါတယ်။
ဒါကြောင့် အဲဒီပူးတွဲပေးပို့စာနဲ့ပတ်သက်ပြီး အမြန်ဆုံးပြန်လည်ရုတ်သိမ်းပြီး လူသိရှင်ကြားတောင်းပန်ဖို့နဲ့ NUG သာ မြန်မာနိုင်ငံရဲ့ တရားဝင်အစိုးရတစ်ရပ်အနေနဲ့အသိအမှတ်ပြုတဲ့ စာအပြည့်အစုံကိုရေးသားထုတ်ပြန်ဖို့ မျှော်လင့်ကြောင်း NUG က ပြောထားပါတယ်။
