သွားလာရေးအတွက် ဆိုင်ကယ်အသုံးများတဲ့မန္တလေးမှာ စက်သုံးဆီဆက်လက်ပြတ်လပ်နေတာကြောင့် ဒေသခံတွေ အခက်အခဲကြုံနေရပါတယ်။
ဆီဆိုင်ကြီးတွေမှာလည်း အကန့်အသတ်နဲ့သာ ရောင်းချပေးနေပြီး စက်သုံးဆီဈေးဟာမြင့်တက်နေဆဲပါ။
ဆီဆိုင်ကြီးတွေဖြစ်တဲ့ Denko၊ BOC၊MAX၊360°စတဲ့ဆိုင်တွေမှာ အချိန်တစ်ခုသတ်မှတ်ပြီးရောင်းချနေ တာကြောင့် ဆီဝယ်ယူနိုင်ဖို့အတွက် တန်းစီနေရပြီး အလှည့်မရောက်ခင် ဆီပြတ်သွားတာမျိုး ကြုံနေရတယ်လို့ဒေသခံအချို့ကပြောပါတယ်။
” တစ်နာရီကျော်လောက် တန်းစီပြီးစောင့်နေတာ ကိုယ့်အလှည့်ရောက်ခါနီးမှာ ဆီကုန်သွားပြီတဲ့ အဲဒါနဲ့နောက်တစ်ဆိုင်ထပ်တန်းစီးရတယ်” လို့ ဆီဆိုင်မှာ ဆီသွားဖြည့်ခဲ့တဲ့ မန္တလေးမြို့ခံတစ်ဦးက ပြောပါတယ်။
မန္တလေးမှာ ဆီဆိုင်ကြီးတွေသာဖွင့်လှစ်ထားသာတွေ့ရပြီး ဆီဆိုင်အသေးစားတွေပိတ်ထားကြပါတယ်။
ဆီဆိုင်ကြီးတွေမှာ အချိန်လုပြီး တန်းစီမဝယ်ယူနိုင်တဲ့ အောက်ခြေပြည်သူအချို့အနေနဲ့ လမ်းဘေးဆီဆိုင်တွေမှာ ဈေးကြီးပေးပြီး ဝယ်ရတာမျိုးတွေလည်းရှိနေပါတယ်။
လမ်းဘေးဆီဆိုင်အချို့မှာ တစ်လီတာကို ကျပ်ငါးထောင်ထိပေါက်ဈေးရှိနေတယ်လို့သိရပါတယ်။
ဒီနေ့ မန္တလေးမြို့ရဲ့ စက်သုံးဆီပေါက်ဈေးဟာ ၉၂ တစ်လီတာကို ၂၃၆၅ကျပ်၊ ၉၅ တစ်လီတာကို ၂၄၃၅ကျပ် နဲ့ရောင်းချနေတာတွေ့ရပါတယ်။