ကော့ကရိတ်မြို့မှာ တိုက်ပွဲတွေဖြစ်ပြီးတဲ့နောက် စစ်ကောင်စီလက်အောက်ခံ ရဲတပ်ဖွဲ့ဝင်တွေအနေနဲ့ တော်လှန်ရေးအင်အားစုအဖွဲ့တွေနဲ့ လာပူးပေါင်းကြဖို့ ဗိုလ်မှူးစောကျော်သက်က တိုက်တွန်းပြောကြားလိုက်ပါတယ်။
ကော့ကရိတ်မြို့ပေါ်မှာ ဒီကနေ့မနက်ပိုင်းက စစ်ကောင်စီတပ်နဲ့ တော်လှန်ရေးအင်အားစု ပူးပေါင်းတပ်ဖွဲ့တွေအကြား ထိတွေ့တိုက်ပွဲတွေဖြစ်ပွားခဲ့ပြီး ကော့ကရိတ်ခရိုင်ရဲမှူးဖြစ်သူအပါအဝင် အနည်းဆုံးသုံးဦးခန့်သေဆုံးသွားကာ လက်နက်ခဲယမ်းတွေလည်းသိမ်းဆည်းရခဲ့တယ်လို့ ပူးပေါင်းအဖွဲ့က ထုတ်ပြန်ထားပါတယ်။
“ကျနော်တို့ဆီမှာ လာပူးပေါင်းပါ။ စကစနဲ့ မပေါင်းပါနဲ့လို့။ စကစနဲ့ပေါင်းလို့ရှိရင် ထပ်ပြီးတော့ဒုက္ခရောက်မယ်လို့ ကျွန်တော်ကမှာကြားချင်တယ်။ စကစကို လုံး၀သွားမပေါင်းနဲ့။ စကစပေါင်းလို့ပေါင်းတဲ့လူတော့ ဒီလိုမျိုးပုံစံကြည့်လိုက်ပါ ဒီလိုမျိုးဖြစ်လာမှာပါ” လို့ ပူးပေါင်းအဖွဲ့က ဗိုလ်မှူးစောကျော်သက်က ပြောပါတယ်။
တိုက်ပွဲဖြစ်ပွားပြီးတဲ့နောက် စစ်ကောင်စီတပ်ဟာ ကော့ကရိတ်မြို့အနီးက ကေအဲန်ယူထိန်းချုပ်ထားတဲ့ ကျေးရွာတွေအပေါ် လက်နက်ကြီးပစ်ခတ်တာတွေလုပ်ဆောင်နေလို့ ဒေသခံအရပ်သားတွေ ထိခိုက်ဒဏ်ရာရရှိမှုတွေရှိခဲ့တယ်လို့ သိရပါတယ်။
