စစ်ကိုင်းတိုင်း၊ မုံရွာမြို့တွင် မိုင်းဆင်ထားသည့်နေရာသို့ ရောက်လာသည့် စစ်ကောင်စီတပ်ကင်းပုန်းအား မိုင်းခွဲတိုက်ခိုက်ခဲ့ကြောင်း Chindwin Attack Force အဖွဲ့က သတင်းထုတ်ပြန်သည်။
ယမန်နေ့ (သြဂုတ်၁၄ ရက်) ည ၇ နာရီခွဲဝန်းကျင်က မုံရွာမြို့ အက်တောရွာမြောက်ဘက်နှင့် မွေးမြူရေးဇုန်ကြားတွင် စစ်ကောင်စီတပ်က ကင်းပုန်းလာချခဲ့သည်။
ကင်းပုန်းကျသည့် စစ်ကောင်စီတပ်ဖွဲ့ဝင် သုံးဦးသည် မိုင်းဆင်ထားသည့်နေရာသို့ ရောက်လာ၍ အချိန်ကိုက် မိုင်းခွဲတိုက်ခိုက်ခဲ့ကြောင်း Chindwin Attack Force အဖွဲ့၏ ထုတ်ပြန်ချက်တွင် ဖော်ပြသည်။
![Public Service Announcement](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
ထိုသို့ မိုင်းခွဲတိုက်ခိုက်မှုကြောင့် စစ်ကောင်စီတပ်သား သုံးဦးလုံး သေဆုံးသည်ဟု ဆိုသည်။
အထက်ပါစစ်ဆင်ရေးအား မုံရွာခရိုင်ပြည်ကာကွယ်ရေးတပ်မတော် (Chindwin Attack Force) တပ်ရင်း (၂)၊ တပ်ခွဲ (၄) Fight For People – F.F.P အဖွဲ့တို့ ပူးပေါင်းဆောင်ရွက်ခဲ့ကြောင်း ၎င်းတို့ကအသိပေးထားသည်။
ဖြစ်စဥ်နှင့်ပတ်သက်ပြီး Chindwin Attack Force အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ ထိခိုက်သေဆုံးမှုအခြေအနေနှင့်ပတ်သက်၍ People’s Springက ထပ်မံအတည်ပြုနိုင်ခြင်းမရှိသေးပေ။
Chindwin Attack Forceသည် ယနေ့ (သြဂုတ်၁၅ ရက်) နံနက် ၂ နာရီဝန်းကျင်က စတင်ကာ မုံရွာ မြို့အဝင် မအူစစ်ဆေးရေးဂိတ်ကို လက်နက်ကြီးလက်နက်ငယ်များဖြင့် ပြောက်ကျားထိုးစစ်ဆင်ခဲ့ရာ ၄၅ မိနစ်ကျော် အဆက်မပြတ် ထိုးစစ်ဆင်မှုအတွင်း စစ်ကောင်စီသား ခြောက်ဦးသေဆုံးသည်ဟု ထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)