စစ်ကိုင်းတိုင်း ယင်းမာပင်မြို့နယ် ရင်ပေါင်တိုင် ကျေးရွာသို့ စစ်ကောင်စီတပ်က ဩဂုတ် ၁၁ရက်တွင် လေကြောင်းမှ အင်အားသုံး ဝင်ရောက်စီးနင်းတိုက်ခိုက်ခဲ့ရာ ဒေသခံ ပြည်သူ ၃၀ခန့်သေဆုံးခဲ့ရကြောင်း သတင်းရသည်ဟု ယင်းမာပင်ဒေသခံပြည်သူ့ကာကွယ်ရေးတပ်(PDF)တာဝန်ရှိသူ တစ်ဦးက ပြောသည်။
” အဲဒီဟာက ဒေသခံအရပ်သား ပြည်သူတွေ။ ပြောရမှာ စိတ်တောင်မကောင်းဘူး ၃၀လောက် အဲဒီလောက်အထိ တွေ့တယ်တဲ့။ ဘယ်လိုအခြေအနေမျိုးမှာ ထိခိုက်လဲဆိုရင် လျှပ်တပြတ် ဝင်ပြီး အပေါ်ကနေ ရဟတ်ယာဉ်နဲ့ ပစ်တယ်။ ပစ်တဲ့အချိန် တချို့ကရောက်ရာ နေရာမှာ ဝပ်တယ်ပေါ့။ အဲဒီအချိန်မှာ MI-17နဲ့ စကစတွေကို မြေပြင် ပေါ် ကို ချပေးတယ်။ ချပေးတော့ မြေပြင်ကလည်း ရောက်လာတယ် အပေါ်ကလည်း ပစ်ခတ်နေတယ်ဆိုတော့ အဲဒီမှာတချို့က ထွက်ပြေးကြတာ ၊ ထွက်ပြေးကြတဲ့အခါ ရဟတ်ယာဉ်ပေါ်က ပစ်တာရော အဲဒီမှာ ထိခိုက်ကျဆုံးကုန်ကြတယ်လို့ ထင်တယ်”ဟု ၎င်းက ဆိုသည်။
ထိုသို့သေဆုံးခဲ့ရသူများထဲတွင် PDF အချို့၊လူကြီး၊လူငယ်၊ကလေး၊အမျိုးသမီး၊အမျိုးသား အရွယ်စုံ ပါဝင်သည်ဟုလည်း ဒေသခံ PDF တာဝန်ရှိသူက ပြောသည်။
“ရွာသူရွာသားတွေအကုန်လုံး မဝင်နိုင်လောက် သေးဘူး။ မဝင်ရဲလောက်သေးဘူး။ သူတို့က နဖူးတွေ့ဒူးတွေ ပထမဆုံးတွေ့တာ။ အကြမ်းဆုံးတွေ့တာ။ အကြမ်းဆုံးတွေ့တော့ ဒေသခံ ပြည်သူတွေ သေဆုံးထားတဲ့ ရုပ်အလောင်းတွေရော နောက်တစ်ခါ ခိုင်းနွား၊ ကျွဲတွေ ၊ မြင်းတွေရော အများကြီးသေတာကိုး။ ဆိုတော့ ရွာထဲမှာ အနံအသတ်တွေထွက်ပြီးတော့ တော်တော်လေးကို မနက်ခင်းက အားတိုက် အင်တိုက် ရှင်းယူရတယ် ပြောတယ်။” ဟု ဒေသခံPDF တာဝန်ရှိသူက ပြောသည်။
စစ်ကောင်စီတပ်များ ပြန်လည်ဆုတ်ခွာသွား၍ လက်ရှိတွင်ကျေးရွာအတွင်းရှင်းလင်းရေးလုပ်ငန်းများ လုပ်ဆောင်နေကြောင်း၊ထွက်ပြေးတိမ်းရှောင်နေရသည့် ပြည်သူများအားလုံး ပြန်လည် ဝင်ရောက်နိုင်သည့် အခြေအနေမရှိသေးကြောင်း ၎င်းက ဆိုသည်။
“နောက်တစ်ခုက ရွာထဲမှာ ဘယ်သူပျောက်တယ် ဘယ်သူမရှိဘူးဆိုတဲ့ ဇစ်မြစ်က တော်တော်လေး လိုက်ယူမှ ရမယ်” ဟု ဒေသခံ PDF တာဝန်ရှိသူက ပြောသည်။
စစ်ကောင်စီတပ်သည် ရင်ပေါင်တိုင်မှ ထွက်ခွာသွားပြီးနောက် ပထိုးသာရွာတွင်လည်း နေအိမ် ၇လုံးကို မီးရှို့ဖျက်ဆီးသွားကြောင်း ဒေသခံ PDFက ပြောသည်။
စစ်ကောင်စီတပ် ရင်ပေါင်ရွာမှ ပြန်လည်ထွက်ခွာစဉ် ရင်ပေါင်တိုင်ရွာခံများကို ဖမ်းဆီးသွားသည် ဟု သိရကြောင်း ဒေသခံအချို့က ပြောကြားခဲ့သော်လည်း သီးခြားအတည်ပြုချက်မရသေးပေ။
ရင်ပေါင်တိုင်ရွာတွင် စစ်ကောင်စီတပ်များ ရောက်ရှိတပ်စွဲချိန် ဒေသခံ ပြည်သူ့ကာကွယ်ရေးတပ်များကလည်း တိုက်ခိုက်ခဲ့ရာ တိုက်ပွဲများဖြစ်ခဲ့ပြီး စစ်ကောင်စီတပ်က သေဆုံးထိခိုက်များနိုင်ကြောင်း ဒေသ PDF တာဝန်ရှိသူ တစ်ဦးက ပြောသည်။
