မြိတ်မြို့ပေါ် လက်နက်ကိုင်ပြီး ကားဖြင့်လှည့်နေသည့် စစ်ကောင်စီလက်ကိုင်တုတ် ပြည်သူ့စစ်အဖွဲ့ကို မိုင်းဆွဲတိုက်ခိုက်ခဲ့ရာ ပြည်သူ့စစ်တစ်ဦးသေဆုံးသွားကြောင်း မြိတ်(ပကဖ)က ယနေ့ (သြဂုတ် ၁၆)တွင် ထုတ်ပြန် သည်။
ယနေ့နံနက် ၆ နာရီခန့်က မြိတ်မြို့ပေါ် ကားဖြင့်လှည့်နေသော ပြည်သူ့စစ်အဖွဲ့ကို မြိတ်လေယာဥ်ကွင်းအနီး ကံဖျားမြေနီလမ်းထိပ်တွင် မိုင်းဆွဲတိုက်ခိုက်ခဲ့ပြီး ပြည်သူ့ စစ်တစ်ဦးပွဲချင်းပြီးသေကာ ငါးဦးအပြင်းအထန်ဒဏ်ရာရသွားကြောင်း ဖော်ပြသည်။
“(မိုင်း)တစ်လုံးပါ။ မြိတ်ကပြည်သူ့စစ်အားကောင်းတဲ့မြို့လို့ပြောရမယ်”ဟု မြိတ်(ပကဖ)မှ တော် လှန်ရေးရဲဘော်တစ်ဦးက ပြောသည်။
မိုင်းခွဲတိုက်ခိုက်ပြီး စစ်ကောင်စီတပ်မှ လမ်းဆုံလမ်းခွများတွင် စစ်ဆေးမှုများပြုလုပ်နေပြီး ပြည်သူများအနေဖြင့် သတိထားသွားလာ၍ သတိပြုဆင်ခြင်ကြရန် မြိတ်ပြည်သူ့ကာကွယ် ရေးအဖွဲ့(ပကဖ)က မေတ္တာရပ်ခံထားသည်။
“ပြည်သူ့စစ်တွေ အားကောင်းတော့ ဆိုင်ကယ်ဖမ်းတာလည်း သူ့တို့ပဲ။ ဧည့်စစ်တာလည်း သူတို့ပါတယ်။ လမ်းမှာ သွားလာနေတဲ့သူတွေကို မသင်္ကာဘူးဆိုပြီးဖမ်းတာလည်းပါတယ်။ စစ်ကောင်စီနဲ့ မခြားပါဘူး။ လုပ်ပိုင်ခွင့်တွေလည်း ပေးထားတယ်။ အားလုံးက အလိုတူအလိုပါတွေပါပဲ”ဟု မြိတ်(ပကဖ)က မှတ်ချက်ပေးသည်။
ထို့အပြင် စစ်ကောင်စီက လက်သပ်မွေးထားသည့် လက်နက်ကိုင် ပြည်သူ့စစ်အဖွဲ့ဆိုသူများသည် မြိတ်မြို့ပေါ်ရှိ ပြည်သူလူထုအပေါ် နည်းမျိုးစုံဖြင့် အနိုင်ကျင့်ဗိုလ်ကျသည့်အပြင် စျေးဆိုင်များတွင် ဆပ်ကြေးကောက်မှုများလည်းရှိနေကြောင်း စုစမ်းသိရသည်။
